Ang hulagway sa semifinals ingon man sa quarterfinals

CEBU, Philippines –  Ugma na ang semifinal round sa senior's division sa 14th season sa Cebu Schools Athletic Foundation. Inc kun CESAFI  ug ang quarterfinal round sa high school division diha sa  Cebu Coliseum.

Upat ka seniors' teams ang  nahibilin kinsa miabante sa semifinals samtang duha ang nanamilit na. Kalit nga nausab ang hulagway sa semifinals kaniadtong Sabado nga maoy kataposang duwa sa elimination round dihang midaog ang University of San Jose Recoletos Jaguars batok sa Southwestern University Cobras, 84-73.   

Tungod lagi kay gi-ingon man nga "sometimes, losing is an art," daghan ang nagduda  nga tuyo nga nagpapilde ang Cobras aron makalikay sila sa defending champion University of  the Visayas Green Lancers sa semifinals. Ug may katarungan ang Cobras nga ila kining buhaton tungod kay sila man maoy natumngan sa kataposang duwa sa elimination busa sila maoy mokontrolar sa duwa o mopili kung kinsay gusto nilang kontrahon.  

Wala pa malimot ang Cobras kon gi-unsa pagtangtang sa Lancers ang ilang tango sa miaging tuig sa best-of-five finals dihang giyabo sa Lancers ang  "venom" sa Cobras nga gisulod sa garapa. May 2-0 na nga bentaha ang Cobras sa maong finals ug usa nalang unta ka daog, ila nang saulogon ang ilang ikaduhang titulo sa  CESAFI. Apan wala motugot ang Lancers ug ilang giharus ang tulo ka duwa aron sila maoy makaangkon sa titulo, ang ilang ika-10 nga kampyonato.  

Ang University of San Carlos Warriors kinsa maoy no. 1 seed maoy makigsangka sa no. 4 nga Lancers samtang mag-usab ang no. 2 nga Cobras ug ang no. 3 Jaguars. Dinhi na mailhan sa publiko kung tuyo bang nagpapilde ang Cobras o lupig gyud sila sa Jaguars.   

Tinuod nga naa nahimutang sa ika-upat nga pwesto ang Lancers apan sa paglikay kanila sa Cobras, usa kana ka senyales nga  gikuyawan ang laing tulo ka teams sa "comeback"  bid sa Lancers. Lahi ang format sa juniors division tungod kay may daghan ang teams nga misalmot. Sa siyam ka teams, awtomatik nga miabante sa semifinals ang topseed ug 8-0 nga Sacred Heart School-Ateneo de Cebu Magis Eagles samtang ang duha ka teams nga dunay labing ubos og recond natagak nga mao ang wala'y daog nga Don Bosco Technology Center Greywolves (0-8). 

Ang nahibiling unom ka teams mag-agi una'g quarterfinals diin ang no. 2,3 ug 4 seeds adunay twice-to-beat advantage batok sa 5,6 ug 7. Mao kini ang match-ups; no. 2 UV vs. no 7. USJR, no. 3 USC vs. 6 USPF ug no. 4 CIT-U vs. no. 5 UC. Kaninyong tanan, good luck. May the best team wins. (BANAT NEWS)