Cebuano triathletes wala paperi sa Tunaman Lawihan triathlon

CEBU, Philippines - Wala pabangbang ang mga Sugbuanong triathletes nga moapil sa umaabot nga  World Xterra Championships dihang mihipos sila’g daog atol sa gipahigayong  Tunaman Lawihan Triathlon kagahapon didto sa General Santos City.

Si Joseph Miller nahimong second overall sa men’s open human niya gitapos ang 1.5K swim, 40K bike ug 10K run race sud sa duha ka oras ug 18 minutos. Si Banjo Norte mao ang mihawod sa maong dibisyon sud sa duha ka oras ug nuybe minutos, samtang si Jo Mahinay nahimutang sa ikatulo sa oras nga 2:23.

Ang teammate ni Miller nga si Jose Merdino Lim naghari sa 25-34 class sa oras 2:25, samtang si Noy Jopson midominar sa 35-44 division sa oras nga 2:32. Wala sab paperi si Tenggoy Colmenares, kinsa maoy mihari sa 45-above division sa oras nga 2:43.

Sila si Miller, Lim ug Colmenares nangandam alang sa World Xterra Champion didto sa Maui, Hawaii sa Oktubre 26. (BANAT NEWS)