CEBU, Philippines- Gilubong og 22 puntos sa tunga-tungang bahin sa second period ang University of Cebu (UC) Junior Webmasters, apan naghuramentado sa second half aron mohimo’g dakung kadaugan batok sa Cebu Eastern College (CEC) Dragons, 91-64 sa 14th Cebu Schools Athletic Foundation, Inc. (CESAFI) kagahapon didto sa Cebu Coliseum.
Ning pagsuwat, padayon pang nagsangka ang UC Webmasters batok sa defending ug 10-time champion University of the Visayas (UV) Green Lancers, kinsa nagtinguha nga inaton ang ilang win-loss rekord ngadto sa 4-3.
Ang Junior Webmasters kinsa nabiyaan og 22 puntos sa 5:13 ang oras sa second quarter, 14-36, nakadaginot og pipila ka puntos ug nakan-an ang labaw ngadto na lang sa 16 puntos sa halftime, 28-44. Apan daw dili katuohan, nagmangtas ang Junior Webmasters aron mobalitok didto sa third period pinaagi sa ilang makabungog nga 46-10 scoring run diin ilang gitapos ang maong kuwarter sa iskor nga 74-54.
Laing 17-10 run ang gihimo sa Junior Webmasters sa fourth period diin ilang na-outscore sa kinatibuk-ang second half ang Dragons, 63-20.
Dihang nausab ang luag nga depensa sa Junior Webmasters gikan sa zone defense ngadto na sa trapping defense, daw nakuratan ang Dragons, kinsa wala na gyud makaginhawa tungod sa kahugot sa depensa.
Wala kapugngi sa iyang mga tirada ang UC junior star nga si Darrel Shane Menina, kinsa miposa’g 30 sa iyang 39 puntos sa second half aron pangulohan ang kadaugan. Samtang ang 1-6 nga Dragons gipangulohan ni Ivan Augustine Mate sa iyang 24 puntos. (BANAT NEWS)