CEBU, Philippines - Ang defending champion Aegis Vipers naka-eskapo bitbit ang 61-59 nga kadaugan batok sa Lexmark Stallions sa 10th CSCC E-League basketball tournament niadtong Sabado diha sa City Sports Club-Cebu gym sa Cebu Business Park.
Sa gilauman, sikit kaayo ang aksiyon sa duha ka mga dekalibreng koponan nga maoy nag-abot sa finals sa miaging tuig, apan ang Aegis miarangkada sa nahabiling duha ka kuwarter.
Biya og nuybe puntos ang Aegis, 22-31, apan mibawos kini sa third period, 18-12 dayon ilang nasustinihan ang momentum sa hinapos nga bahin sa duwa aron mabuntog ang Lexmark.
Si Bryan Veloso maoy nangu sa Aegis nga mihakot og 19 puntos, samtang si Dean Junber Escalon mikandos og 10 puntos.
Ang naparot nga Lexmark gipangulohan ni Sylvester Millevo, kinsa mikimada og 18 puntos, apan dili kini igo aron iya mapadaog ang Lexmark. Sila si Niel Tiempo ug Ralph Loren Martinez mitimbre'g 14 ug 11 puntos matag usa alang sa kapildihan.
Sa laing mga duwa, sila si Ildefonso Bulangis Jr. ug Archie Brian Vincent Matua nagkumboya og 22 puntos alang sa Accenture Sharks nga mipulbos sa Calltek Trojans, 63-32, samtang si Earvin Ferraren mipabuto'g 20 puntos aron pangulohan ang Xerox Knights nga midaog batok sa Kyocera Frontiers.
Si Marco Antonio Real mitusak og 18 puntos alang sa Teleperformance Kings, kinsa milubong sa Job Target Bandits sa iskor nga 71-45. (BANAT NEWS)