CEBU, Philippines - Ang Nigerian import nga si Ola Adeogun maoy nangu sa powerhouse nga San Beda (SB) Red Lions, kinsa mitukob dayon og daog batok sa host Jose Rizal University (JRU) Heavy Bombers, 57-49 sa pagbukas sa 90th season sa NCAA men's basketball tournament kagahapon didto sa Mall of Asia Arena.
Ang 6-foot-8 nga si Adeogun mibahog og 20 puntos ug milangkat og 14 ka rebounds uban ang duha ka block shots alang sa Red Lions nga mipasar dayon sa malisud nga pagsuway alang sa ilang kampanya sa talagsa-ong five-peat.
Suwayan sa San Beda ang pagkulit og five-peat aron matupngan ang gihimo sa San Sebastian College sa tunga-tungang bahin sa dekada 90.
Si Adeogun nakakuha sab og suporta gikan nilang Baser Amer, Art dela Cruz ug Anthony Semerad.
Ang hugot nga depensa ni Adeogun mao sab ang hinungdan nga wala mapiog sa Bombers ang Red Lions.
Ang top gunner sa JRU nga si Philip Paniamogan, miiskor og 12 puntos, apan misipyat siya'g pito sa napulo niya ka tirada gikan sa three-point territory nga nagpaaslom og samot sa field shooting sa Bombers. Ang ilang 6-foot-6 import nga si Wahab Abdul Razak igo lang mihimo'g sayes puntos. (BANAT NEWS)