CEBU, Philippines - Wala damha nga moabante ngadto sa semifinals ang Ynah Brokers human sila makalusot og duha ka knockout matches nga parehong sikit kaayong resulta dihang ilang gipatapsingan ang Avenindo Brokers sa miaiging semana, 88-87 ug naka-ipsot sab sila batok sa mas lig-on nga Enforcement Security Service (ESS) 87-85 kaniadtong Huwebes atol sa quarterfinal round sa 2nd BOC-CIPI Fellowship Cup basketball tournament didto sa barangay Tinago gym, ning dakbayan.
Sa laing duwa sa quarterfinals, midaug ang Ecu Line ni Primitivo Mondin batok sa JDV sa iskor, 93-84 aron maangkon ang ikaduhang luna sa semifinals.
Sayong naunhan sa Ynah ang ESS pinaagi sa double figures nga abante apan hinay-hinay nga nakaapas ang mas dagko nga ESS tungod sa presensiya ni Tata Laborte kinsa maoy nangu sa opensa sa Ynah sa iyang 28 puntos.
Ang ESS gipangulohan ni Ramil Aninon sa iyang 23 puntos samtang sila si Michael Yu ug Kenenth Maningo midugang og 14 ug 11 puntos matag usa.
Maoy makontra sa Ynah ang Petracorta-Rollway samtang ang Ecu Line makigsangka sa defending champion MJDL Brokers sa knockout semifinals ugma diin ang modaug maoy moabante sa finals unya sa Huwebes.
Human sa finals, sugdan dayon ang 3rd season sa unang semana sa Agosto matud pa sa usa sa mga organizers nga si Boodie Monteno kinsa maoy team leader sa ESS.
Ang nuybe puntos ni Mondin sa maong duwa pulos gikan sa iyang tulo ka three-pointers samtang midugang og 13 puntos ang usa sa pambato sa team nga si Loreto Castillo alang sa Ecu Line.
Puntos matag usa:
First Game:
Ynah (87)--- Laborte 28, Lobitana 11, Allerite 11, Peras 10, Garcia 9, Villarin 7, Purcia 2, Piape 2, Oporto 1.
ESS (85)--- Aninon 23, Yu 14, Mangingo 12, Mose 7, Canete 6, Gabiana 5, Oyao 3, Isidro 3, Monteno 2, Gacilos 2.
Second Game:
Ecu Line (93)--- Maunes 21, Singson 19, Into 18, Castillo 13, Mondin 9, Olmedo 5, Labrador 2, Cabillada 2, Sasing 2.
JDV (84) --- Ybanez 19, Villarin 14, Pangue 14, Sanguenza 14, D. Villarin 13, Cabanada 4, Viodor 3, Munda 2. – GGM (FREEMAN)