CEBU, Philippines - Gipakita sa Aegis Vipers nga seryoso sila sa ilang title defense dihang ilang gikulata ang 1&1 Marauders, 62-40 sa nagpadayong aksiyon sa 10th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Si Ryan Veloso mikadlit og 12 puntos uban ang lima ka rebounds ug duha ka assists alang sa Aegis Vipers nga mikontrolar sa duwa human moposte'g 28-20 nga bentaha sa halftime.
Ang Aegis mihimo'g 14-8 run sa third period ug ilang gitapos ang duwa pinaagi sa pagpabuto'g 20-12 nga bomba aron mokulit og 22 puntos nga kadaugan.
Si Veloso gipaluyohan sab nilang James Lester Navaja ug Kevin Clark Navaja, kinsa nagkumboya'g 21 puntos, siyam ka rebounds, duha ka assists ug duha sab ka steals.
Bugtong si Raymond Basañez lang ang nakaiskor og double-digit alang sa 1&1 Marauders pinaagi sa iyang 17 puntos ug siyam ka rebounds.
Sa laing mga duwa, ang Lexmark Stallions, Convergys 1 Wolves ug ePerformax Reds nagmadaugon sab batok sa tagsa-tagsa nila ka kaatbang.
Si Franco Angelo Cipriano mikabkab og 14 puntos aron pangulohan ang Lexmark ngadto sa65-47 nga kadaugan batok sa Supportsave Dragons. Si Mark Alvarez milansang og 16 puntos ug lima ka rebounds aron maoy mangulo sa Convergys 1 pagpukan sa Accenture Sharks, 56-54, samtang si Joey Mari de Guzman mikulit og 15 puntos alang sa ePerformax nga midaog batok sa Teletech Titans, 53-43. (BANAT NEWS)