CEBU, Philippines - Upat na ka teams ang kompirmadong mosalmot alang sa Cordova Inter-Commercial basketball tournament nga gikatakda sunod buwan didto sa Cordova Sports Complex.
Sumala pa ni tournament commissioner ug Basketball Association of Cordova (BAC) manual author Boy Allan Lataza nga ang mosalmot mao ang Avon Philippines, Rollway Brokers, Collis ug CHB.
Apan si Cordova barangay councilor Roque Yburan miingon nga iyang paabuton nga moabot kini ngadto sa walo o 10 ka teams aron mas alegre ang maong torneyo.
Niadtong interesadong mosalmot, mahimong motawag kang Paolo Tagsip sa 0922-8165815.
Si Yburan, kinsa maoy chairman sa Cordova Sports Commission mipahibalo nga andam na sab tanan alang sa tinuig nga Cordova Inter-Barangay basketball tournament nga sugdan ugma didto gihapon sa Cordova Sports Complex.
Naglaraw sab sila si Yburan ug Lataza nga mopasiugda'g Inter-Collegiate tournament.
Matud pa ni Yburan ug Lataza nga makigkita sila ni Cebu Schools Athletic Foundation Inc. (CESAFI) commissioner Felix O. Tiukinhoy Jr. ugma sa buntag aron hisgutan ang maong butang. (BANAT PALARO)