Tuburan mosuporta ni Sevillano

CEBU, Philippines - Ang lokal nga kagamhanan sa Tuburan ubos sa liderato ni Mayor Democrito 'Aljun' Diamante Jr. mobubo'g suporta ngadto sa ilang  chess player nga si Rhenzi Kyle Sevillano sa umaabot niyang kampanya sa 15th Association of Southeast Asian Nations Age-Group Chess Championships nga gikatakda sa Hunyo 3-12 didto sa Sands Cotai Central sa Macau, China.

Ang  14-anyos nga si Sevillano nakakuha'g pasaporte sa maong kompetisyon human maghari sa 16-under category sa  2014 National Age-Group Championships nga gipasiugdahan sa National Chess Federation of the Philippines (NCFP) duha na ka bulan ang milabay didto sa San Antonio, Quezon Province.

Misaad si Sevillano nga  iyang ipakita ang tanan  niyang  abilidad ning 10 ka adlaw nga torneyo nga salmotan dili lang sa mga maayong laking magduduwa gikan sa  Southeast Asian region, apan lakip usab sa non-ASEAN countries sama sa Japan, South Korea, India, China ug Russia.

Gawas ni Sevillano, laing tulo ka masaarong chess players sa Sugbu nga silang John Jerish Velarde, Alphecca Gonzales ug Casey Manlosa nakakuha sab og luna ngadto sa Macau sa ilang paghari sa tagsa-tagsa nila ka age-groups atol sa national qualifying event. (BANAT NEWS)