CEBU, Philippines - Ang free-throw ni import Eric Wise maoy nahimong yawi sa kadaugan sa Barako Bull Energy Cola batok sa Meralco Bolts, 95-94, kagahapon sa pagbukas sa PBA Governor's Cup didto sa Smart Araneta Coliseum.
Si Wise miposa og 33 puntos lakip na ang usa ka free-throw sa katapusang 1.3 segundos nga mikompleto sa come-from-behind nga kadaugan sa Barako.
Naglisud ang import sa Meralco ug kanhi NBA cager nga si Terrence Williams kinsa igo lang nakahimo og 19 puntos.
Milabaw ang Bolts sa pagsulod sa final period, 70-68 ug giinat pa nila ang labaw ngadto sa onse puntos 82-71 sa tunga-tungang bahin sa kuwarter.
Apan wa mawad-i og paglaum ang Barako ug sa paningkamot ni Wise natabla nila ang score 92-all. Human sa air ball ni Williams, daling miiskor si Wise aron hingpit nga makuha ang labaw 94-92.
Ang free-throw ni David mitabla sa iskor 94-all, apan dali siyang nabawsan ni Wise kinsa nakakuha usab og krusyal nga foul.
Ang kadaugan sa Barako naghatag og nindot nga sinugatan alang sa bag-o nilang coach nga si Siot Tanquincen. (BANAT PALARO)