MS Motosuit Motocross TV isalida sa CCTN 47 ugma
CEBU, Philippines - Isalida na sa CCTN 47 ang pilot episode sa MS Motosuit Motocross TV ugma gikan sa alas-10:30 hangtod sa alas-11 sa buntag.
Ibalik sab kini'g pasalida matag Domingo gikan sa alas-10:30 hangtod sa alas-11 sa gabii.
Ipakita sa tunga sa oras nga pasundayag mao ang pagkahimugso sa Cebu Motocross gikan sa Ornopia Cup sa Calambua, San Remigio dul-an na sa duha ka dekada ang milabay hangtod nga milipang ug nabantog na nga kompetisyon nga karon gitawag nga MS Motosuit Motocross Series.
Pagadumalaon sa beterano ug "King of Cebu Motocross" nga si Pepo Rubi ug MS Motosuit operations officer Ramil V. Ayuman, ang espesyal nga pasundayag sa telebisyon mopasalida sab og pipila ka highlights sa labing uwahing aksyon sa MS Motosuit Motocross series nga gipahigayon didto sa Calambua niadtong Abril 13.
Ang kalihukan nga gisalmotan og dul-an 100 ka riders lukop nasud, magsilbe sab nga comeback race sa tinuig nga series.
"Having a television show entails a lot of effort, but we strongly pushed for it as part of our massive buildup to promote motocross across the archipelago. We want the people from other parts of the country to appeciate not only the talents of our riders of world-class caliber, but also the beauty of this sport," matud pa ni MS Motosuit big boss Lou Ornopia, kinsa nahimo sab nga "Sportsman of the Year" sa prestihiyosong Sportswriters Association of Cebu (SAC).
Alang ni Ornopia, ang pakig-alayon sa CCTN Channel 47 maoy tukmang lakang dihang ang broadcast television network nga gipanag-iya sa Archdiocese of Cebu ug gitukod ni Nonito 'Dodong' Limchua adunay lapad nga coverage diin konektado kini sa pipila ka cable TV stations ug apelyado dili lang sa Sugbu ug sa tunga-tungang Kabisay-an, apan sa tibuok Pilipinas. (BANAT PALARO)
- Latest
