CEBU, Philippines - Daw sa wala gihapoy paglubad ang American boxing star nga si Bernard Hopkins kinsa pabilin nga maoy labing edaran nga boxing champion sa kalibutan human niya subling nadepensahan ang iyang titulo batok ni Beibut Shumenov didto sa Washington.
Ang 49-anyos nga si Hopkins mi-unify sa iyang IBF ug WBA title human niya gipilde pinaagi sa unanimous decision ang mas bata nga si Shumenov.
Gipakuratan ni Hopkins ang mga boxing analyst human usab niya ma-knockdown si Shumenov taliwala sa pagduda sa uban nga igo nalang sa pagdaog sa puntosay ang American legend.
"My job is not to worry about the judges. My job is to get ready to unify the championship before 50," matud pa ni Hopkins sa Associated Press.
Sa maong kadaugan si Hopkins nga segurado na nga mahimong Hall-of-Famer mipalambo sa iyang record ngadto sa 55-6, 32KOs, samtang si Shumenov nakahiagum sa ikaduha niyang pilde sa 16 ka away. (BANAT NEWS)