CEBU, Philippines - Mikulit og kasaysayan ang Sugbuanong si Niño Surban didto sa Singapore human siya nahimo isip labing unang men's elite champion sa Tampines Mountainbike Cross-Country Race 1 sa miaging adlaw didto sa Tampines trails, Singapore.
Si Surban sa Team Roentgen/SpecializedPh nakasungasong sa lisud nga hagit batok sa laing 50 ka mountainbikers sa sayong bahin, apan miarangkada siya sa third lap nga gihimo niyang taytayan paingon sa kadaugan.
Ang elite category adunay unom ka laps diin ang matag lap adunay gilay-on nga 4.2 kilometros.
Naunhan ni Surban ang German nga si Lars Droste sa Team Cannondale-Asia, samtang ang pambato sa Singapore nga si Omar Khaniz nalandig sa ikatulo.
Naglaum si Surban nga masustinehan niya ang iyang momentum sa iyang pagsalmot og laing duha ka lumba didto sa Japan sunod bulan.