CEBU, Philippines - Magpinaksitay na ang mga lig-ong koponan sa finals sa Sunrise All Sports Association (SASA) Mini and Midget basketball tournament karong adlawa didto sa New Lahug open basketball court.
Ang Balagtas ug Kamputhaw maoy mag-ilog sa mini division title sa alas-5 sa hapon human sa duwa tali sa Sudlon ug Camagong Underdog nga magsangka alang sa ikatulong dapit sa alas-4 sa hapon.
Sa midget division, ang P3 ug ang Maracas maoy magtigi alang sa titulo sa alas-7 sa gabii. Sa dili pa ang ilang duwa, magsangka una ang San Jose ug Nivel Hills alang sa ikatulong pwesto.
Giawhag ni kanhi CIT Wildkitten ug SASA head Robert Ortega ang mga ginikanan ug mga kahigalaan sa mga teams pagsaksi sa duwa agi'g pagsuporta sa mga kabataan nga mipakita sa ilang katakus sa natad sa basketbol.
Si Ortega giabagan sab nilang Billy Gabiana, Rodel Solimbot, Karen Carnaje ug Max Caballes, usa ka eskrima/martial arts practitioner sa pagpadagan sa maong torneyo. (BANAT NEWS)