CEBU, Philippines - Napuhalan sa trayo nilang Tata Atillo, Clifford Arnoco ug Romy Rivas ang mas ekspirensyado nilang kaatbang aron sakmiton ang unang titulo sa 2014 M. Lhuillier Sinulog Open Darts Tournament sa miaging gabii didto sa Baseline Sports and Recreation Center.
Sila si Atillo, Arnoco ug Rivas milupig nilang Jerome Perales, Topax Salazar ug Danilo Gelliga pinaagi lang sa usa ka punto, 3-2 aron maghari sa three-man team event.
Nabulsa nila ang P6,000 nga ganting salapi nga bunga sa ilang mga paningkamot, samtang si Perales ug kauban nakadawat og P3,000.
Sila si Reden Colina, Jun Sy ug Fernie Sebial miangkon sa ikatulong dapit, samtang sila si Boy Campugan, Eugene Managuit ug Wennie Ocañada mi-okupar sa ikaupat.
Mipahiluna sa ikalima ug ikaunom nga dapit mao ang Team 11 ni Steve Montenegro ug Team 16 ni Allan Veloso.
Gawas sa three-man competition, ang mga partisipante magsangka sab sa dungog sa open singles ug doubles event.
Mokabat sa P45,000 ang giandam nga ganti ning duha ka adlaw nga kompetisyon nga gipasiugdahan sa Cebu Darters Association (CDA). (BANAT NEWS)