CEBU, Philippines - Nagpanikad na ang walay pildeng Southwestern University (SWU) Cobras nga mohimo'g 3-0 sweep, samtang ang University of
the Visayas (UV) Green Lancers mobundak sa ilang katapusang baraha dihang mag-abot na sab kini sa Game-3 sa ilang "best-of-five"
championship series sa 13th Cebu Schools Athletic Foundation Inc. (CESAFI) basketball event karong adlawa diha sa Cebu Coliseum.
Bitbit ang 2-0 nga baraha sa series, ang Cobras nagpanilap na nga motukob sa talagsaong sunod-sunod nga kampiyonato uban
ang laing kadaugan batok sa Lancers nga magsangka sa alas-4 sa hapon human sa duwa tali sa University of San Carlos (USC) Warriors
ug University of San Jose-Recoletos (USJ-R) Jaguars sa tinaktakay nga Game-3 alang sa ikatulong puwesto.
Ang Cobras maoy labing inilog sa maong duwa nga mipukan sa Lancers sa ilang lima ka panagsangka niini nga season diin
ilang nainat ang walay buling nilang baraha nga 14 ka duwa. Gawas pa wala say team nga nakabangon gikan sa 0-2 nga biya sukad
natukod ang liga niadtong 2000.
Gipilde sa SWU ang UV bali'g singko puntos sa ilang unang tulo ka duwa, apan ang Cobras mipahamtang sa Lancers og 12
puntos nga lubong sa una nilang panag-abot, 64-52, gisundan sa 73-60 nga kadaugan sa Game-2 niadtong Huwebes.
Kun molampos, ang Cobras maoy ikatulong CESAFI team nga midaog og "back-to-back" titles nga gipangunahan sa UV
Lancers mihipos og siyam ka sunod-sunod nga korona dihang si coach Elmer 'Boy' Cabahug pa ang nagdala ug ang University of Cebu
(UC) Webmasters ni coach Roel Gomez niadtong 2010 ug 2011 ubos sa pagtimon ni June Mar Fajardo, ang top pick sa PBA draft sa
miaging tuig.
Karong gabii maoy katapusang higayon sa Lancers aron sumpoon ang Cobras apan maglisud kini kay dili man sila kompleto
karong gabhiona tungod kay si Francisco Aron moserbisyo sa iyang one-game suspension human gisagpa og "disqualifying foul" batok
ni Monbert Arong sa SWU atol sa Game-2.
Gumikan niini, itugyan na lang ni UV coach Felix 'Donbel' Belano Jr. ang iyang pagsalig ngadto nilang Steve Cedrick Akomo,
Mike Harry Nzusseu, Arvie Cabañero, Wowie Escocio ug John Abad.
Samtang si SWU coach Raul 'Yayoy' Alcoseba, magsalig gihapon nilang Landry Sanjo, Fabrice Siewe uban sa mga lokal nga
silang Monbert Arong, Bernie Bregondo, Daryl Goloran, Adams Mohammed ug Tallo. (BANAT NEWS)