CEBU, Philippines - Moulbo na ang Cebu Executives and Professionals Chess Association (CEPCA) 16-under rapid tournament karong adlawa didto sa Deep Blue Café sa SM City-Cebu.
Ang 7-round Swiss system competition sugdan sa alas-10:30 sa buntag.
Matud pa ni FIDE Arbiter Marvin Ruelan nga kapin na sa 40 ka entrante, kasagaran niini gikan sa lokal nga mga tunghaan ang mikompirmar sa ilang partisipasyon sa duha ka adlaw nga torneyo nga gipaluyohan ni chess patron Engr.
Benjamin 'Bogie' Lim sa Rose Pharmacy ug sa mga sakop sa CEPCA nga gipangulohan sa ilang presidente nga si Jojo Muralla.
Ang numero sa mga entrante gipaabot nga mosaka pa kay ang mga organizers modawat pa og on-site registration.
Ganting salapi ug tropeyo gikan sa CEPCA ang nagpaabot alang sa top five placers sa matag kategoriya.
Gawas pa niini, ang top three finishers mo-qualify alang sa Batang Pinoy National Finals nga gitakda sa nanghinapos nga bahin ning tuiga.
Ang registration nagkantidad og P100 ug kadtong interesadong mosalmot mahimong motawag o text ni Marvin Ruelan sa 0926-7352951.