CEBU, Philippines - Hugot nga depensa sa fourth quarter maoy gihimong hinagiban sa team Boyla aron maka-eskapo bitbit ang
84-79 nga kadaugan batok sa El General sa kulbahinam nilang duwa sa 7th LLBA-Mayor Paz Radaza Cup basketball
tournament niadtong Mayo 15 didto sa Villas Magallanes gym sa barangay Basak, Lapu-Lapu City.
Sa sayo pa, ang I3R Megabond nilang Dandan Ramos ug Neil Belga miiskor sab og daog batok sa Westland
(Neo-Up), 75-65.
Grabe kaayo ang kahigpit ang depensa nga gipatuman sa Boyla ni Tonton Gelig nga nakaingon sa pagkolapso
sa diskarte sa El General, kinsa nakahimo og daghang sipyat sa himalatyong oras sa duwa.
Gawas sa depensa, epektibo sab ang ilang ball rotation ug transition offense.
Tulo ka player sa Boyla ang miiskor og double figures sa pagpangulo ni Fits Icot nga mihabwa og 17 puntos.
Si Jeje Girasol mikandos og 15 puntos ug si Jerome Plarisan misag-ob og 14 puntos aron tabangan ang Boyla pagdaog sa
una nilang duwa.
Ang El General gipangulohan sab ni Uriel Manilag, kinsa mipabuto og 22 puntos, gisundan ni Ryan Ceniza sa
iyang 11 puntos.
Sa pikas bahin, nakatabla unta ang Westland sa third period, 44-all sa mga paningkamot nilang Archie
Dungon, Paulo Villamor, Michael Ouano ug Archie Ompad, apan kalit nga miarangkada ang I3R Megabond paingon
ngadto sa ganghaan sa kadaugan.
Gipangulohan ni Ramos ang I3R Megabond pinaagi sa iyang 20 puntos, samtang sila si Boboy Navales ug
Neil Belga miamot og 11 ug 10 puntos matag usa.
Sila si Dungon ug Villamor nagkumboya og 24 puntos alang sa naparot nga Westland. (BANAT BALITA)
PUNTOS MATAG USA
Unang duwa:
I3R MEGABOND (75) - Ramos 20, Navales 11, Belga 10, Bardago 6, Hesalta 6, Sipada 5, Dejito 5,
Wagwag 4, Marilao 4, Saryong 4
WESTLAND (65) - Dungon 14, Villamor 10, Aying 8, Ouano 7, Ompad 5, Arabia 5, Campilan 5, Gutib 5,
Igot 4, Padilla 2
Ikaduhang duwa:
BOYLA (84) - Icot 17, Girasol 15, Plarisan 14, Licayan 9, Gelig 7, Lora 5, Lapoja 4, Aying 4, Vecerel 3,
Ybañez 2, Toring 2, Padilla 2
EL GENERAL (79) - Manilag 22, Ceniza 11, Emnace 9, Mepiza 9, Ompad 8, Adlit 7, Samson 4, Bontes 3,
Bacus 2, Areglo 2