CEBU, Philippines - Mitaak na dinhi sa Sugbu ang Mexican fighter nga si Aaron ‘La Joya’ Herrera nga maoy sangkaon ni WBO International light welterweight champion Jason 'El Niño' Pagara karong Sabado didto sa Waterfront Cebu City Hotel and Casino.
Ang Pagara-Herrera showdown maoy main event sa "Pinoy Pride XX: Laban kung Laban" fight card.
Si Herrera (25-1, 17KOs) nga miabot kagahapon sa buntag didto sa Mactan Cebu International Airport (MCIA), nagkanayon nga kompiyansa siya nga masakmit niya ang bakus gikan ni Pagara (32-2,30KOs).
Si Herrera uban sa iyang trainers moatubang karon sa mga sakop sa media sa press conference didto sa Formo Restaurant and Lounge sa Banilad Town Centre.
Gawas ni Pagara, laing ALA Gym boxers nga moaway sa maong fight card mao si Genesis 'Azukal' Servana batok ni Indonesian Isack Junior ug Jimrez 'The Executioner' Jaca batok Mexican Jose Emilio Perea. (BANAT PALARO)