Lancers milatos sa W. Negros sa Coke PBA

CEBU, Philippines -  Ang Cebu champion Team Lancers milubong sa Bacolod champ West Negros University, 96-75 sa pagsugod sa Coca Cola PBA Youngstars basketball tournament Visayas Regional Finals kagahapon didto sa Capitol Parish gym sa dalan Escario, ning dakbayan.

 Si   Theo   Joshua   Flores miiskor og 26 puntos aron pangulohan  ang  Team Lancers, kinsa  nagtinguhang modepensa  sa   ilang    titulo nga ilang nadaog sa miaging tuig.

 Bugnaw ang pagsugod sa Team Lancers  diin milabaw lang sila'g singko puntos, 27-22 human sa first quarter ug  50-41 sa halftime.

 Giinat sa Lancers ang labaw sa third period sa  kombinasyon nilang Flores ug Dexter Silorio nga nagkumboya og 17 sa maong kuwarter alang sa ilang 72-56 nga bentaha.  Ang WNU napugngan  ngadto lang sa 15 puntos sa maong kuwarter.

 Ang WNU mi-rally sa final period,  apan  napakyas sila pag-ilog sa labaw ug ang bugtong  nilang  konsolasyon mao  ang  paglahap  sa labaw sa  13  puntos  tungod  sa kahigpit  sa  depensa sa Lancers. 

 Si Orlan Wamar  mitikdol  og 18 puntos, samtang si Siloro mitimang og 17 ug si Jun Manzo  mihirit og 16 puntos alang sa Lancers.

 Ang WNU gipangulohan ni John Lemuel Pastias kinsa mibahog og 25 puntos, gisundan  ni Jason Celis nga adunay 15 puntos.

 Ang Team Lancers nagtinguha pagdepensa sa ilang korona diin ilang ikasangka ang Ateneo de Iloilo.  (BANAT NEWS)