CEBU, Philippines - Dad-on na sab dinhi sa Sugbu ang Milo BEST Center basketball clinic sa Mayo 6-11 didto sa Sacred Heart School-Ateneo de Cebu Mango Avenue Campus Gym.
Nailhan nga "Milo BEST," ang nationwide clinic nga anaa na karon sa ilang ika-35 nga tuig, mobalik na sab dinhi sa Sugbu aron ipaambit ang ilang dekalidad nga training alang sa mga batan-ong mahiligon sa basketbol.
Ang maong clinic adunay upat ka levels. Ang Level 1 alang sa ball-handling, ang Level 2 sa shooting/offense, ang Level 3 sa defense ug ang Level 4 alang sa individual play.
Ang mga estudyante bahinon ngadto sa duha ka sessions -- buntag ug sa hapon basi sa ilang level ug edad.
Ang BEST Center giila nga maoy nag-una sa pagtudlo og basketball basics ug ang ilang mga produkto naglakip nilang Chris Tiu, Kiefer Ravena, Emman Monfort ug ang mga beteranong sila si Benjie Paras ug Jun Limpot.
Gitukod kini ni coach Nic Jorge niadtong 1978 ug nahimo na kining tinuig nga kalihukan matag summer alang niadtong mga mahiligon sa basketbol. Ang BEST Center mao sab ang nagdumala sa nationwide SBP Passerelle Twin Tournament matag tuig diin magbagat ang mga banggiitang players sa Under 12 ug sa Under 15 divisions.
Nagsugod na karon ang registration didto sa SHS-AdC Mango Avenue Campus gikan sa alas-10 sa buntag hangtod sa alas-12 sa udto Lunes hangtod sa Biyernes. Mahimo sab magparehistro sa SHS- AdC Canduman Gym Office gikan sa alas-8 sa buntag hangtod sa alas- 5 sa hapon.
Sa dugang mga detalye kalabot sa maong clinic, mahimong mokontak sa numero 0908-895-2933, 0923-342 -8193 ug mahimo sab mobisita sa "BEST Center Sports Cebu" sa Facebook. (BANAT PALARO)