Casimero todo-ensayo alang sa iyang title defense

CEBU, Philippines -  Gipakusgan karon ni IBF light flyweight champion Johnriel 'Quadro Alas' Casimero ang iyang training alang sa nagsingabot niyang title defense batok ni Panamanian  Luis Alberto Rios sa Marso 16 didto sa Panama.

 Uban sa iyang trainer nga si Cristopher Tepora, ang 22-anyos nga si Casimero (17-2, 10KOs) todo-ensayo didto sa Omega Boxing Gym aron maseguro ang iyang daog batok ni Rios (18-1, 13KOs).

 Sa taho sa Philboxing.com, si Casimero hinay-hinay nga mikuha sa iyang kondisyon ug migawas na usab ang iyang kapaspas sa punch mitts nga usa sa iyang gamiton atol sa away.

 Wala sab magproblema si Casimero sa iyang timbang tungod kay hapit na niya makuha ang  108 pounds limit.

 Ang taga-Ormoc City nga si Casimero, mipahigayon sab og sparring sessions usa na niini si WBO champion ug ALA Boxing gym superstar  Donnie 'Ahas' Nietes nga iyang gika-sparring sa makaduha ka higayon. (BANAT SPORTS)