CEBU, Philippines - Usa ka nilalang, matinud-anong nahigugma sa usa ka binuhat nga nagpapitik sa iyang kasingkasing, sa pagtuo nga mao na kini ang tawo nga iyang gipaabot: buotan, seryoso, romantiko, mapinanggaon ug labaw sa tanan, mahadlukon sa Ginoo. Ang nahisgutang nilalang, mibuhat sa tanan aron magmalig-on ang bag-ong himugso nga panaghigugmaay nga ilang gisaw-an, dungan sa panghinaot nga sila magmalungtaron ug magmalipayon. Silang duha, batok sa kalibutan ang panumpa nila sa usa’g-usa. Dungan sila gimantala diha sa ilang alimpatakan ang mga esena nga sila maoy bida---malipayon ug matam-is nga talan-awon nga buot nilang masinati sa umaabot.
Sa pagligid sa mga adlaw, inanay nga nausab ang tanan. Nakaamgo ang maong nilalang nga ang binuhat nga iyang kasawo sa ilang nag-uha pa lamang nga relasyon, sukwahi diay sa iyang gihanduraw nga matang sa hinigugma kaniadto. Baruganan sa maong nilalang kabahin sa relasyon kinaraan ug romantiko, diin ganahan niya nga magkuyog sila og simba, mangaon sa gawas, manan-aw og sine, magligid-ligid sa higdaanan samtang manan-aw og salida sa dvd ug labaw sa tanan walay binastos nga mahitabo hangtud nga dili pa tukmang panahon.
Apan ang nahisgutang binuhat buot mutilaw og sige og kiat-kiat, ganahan makigsuod ug mag-igat-igat ngadto sa uban. Sa sinugdanan, puno sa pasensya nga gipiyongan sa maong nilalang ang tanan nga iyang nadiskubrehan kabahin sa maong binuhat. Apan miabot ang panahon nga naupos ang iyang pasensya, kanunay sila nga mag-away, napapas na ang mga bahakhak, mitab-ang na ang kaniadto matam-is nga panag-uban. Sa ilang hamubong relasyon, bisan kausa, wala mahitabo ang gihanduraw sa maong nilalang, sanglit kanunay ra sila nga sa telepono mag-istorya. Pang-text, Facebook chat ug telebabad sa telepono ra ang tanan. Labaw sa tanan, tinuod ang mga pagduda sa maong binuhat: usa lamang siya sa gikalingawan sa nahisgutang nilalang.
Hinungdan nga sakit man sa iyang dughan ug supak man sa iyang kabubut-on, gibugto sa maong nilalang ang higot nga nagkutay kaniya ug sa nahisgutang binuhat. Nagbuwag sila. Dihang mga pangutana sa iyang hunahuna nga hangtud karon wala matubag. May mga higayon sa iyang pag-inusara nga nausik siya sa relasyon nga iyang gibubuan og tumang atensyon ug gi-amuma, nahanaw daw aso, natunaw daw yelo.
Miligid ang daghang buwan, nga wala na magdungog ug magkakita silang duruha, dihang kalit nga mibutho ang binuhat sa nagmalinawon na nga kinabuhi sa maong nilalang. Dugang niini may gibitbit kini nga rebelasyon: walay nausab, ang nilalang gihapon matud pa ang iyang gihigugma. Nag-alindasay ang hunahuna sa maong nilalang. Dili lalim ang iyang nasinati aron mahikalimot sa maot nga panghitabo nga iyang nahiaguman sa kiliran sa maong binuhat. Makadaghan siya mihangad sa langit aron magpabiling malig-on taliwala sa kasakit nga misamad sa iyang balatian. Napungot siya sa iyang kaugalingon, sanglit bisan pa man sa tanan, may gamay pa gihapong pagbati nga nahibilin diha sa iyang kasingkasing alang sa nahisgutang binuhat nga responsabli sa samad sa iyang kasingkasing nga nagbilin og uwat. Pasudlon ba niya pag-usab diha sa iyang kasingkasing ang pagbalik sa maong binuhat aron subling mulipang ang kamatyonan nga gugma nga nahibilin? O mas pilion niya ang gihunghong sa iyang hunahuna nga husto na, sanglit ang samaran nga kasingkasing, tambalan man sa makadaghan, imposibli na nga mahibalik sa naandan?
Pakpak! Advance Happy Valentine’s Day dear okRYANians!
Reaksyon? I-text kana dungan sa imong ngalan ug address sa dili pa ang 12 noon karong adlawa, February 8. Ang numero mao ni: 0943-431-4567. Dili ko makig-textmate ha, text nga may labot lamang sa topic karong adlawa ang dawaton.
Magdungog gihapon kita sa okRYAN sa dyRC-- Radyo Calungsod (648 khz.), Lunes hangtud sa Sabado, 10:30 a.m. to 12noon. Pangitaa ko sa Facebook isip Markado Na, pinaagi niining maong email address: ryanmarkable@yahoo.com. (BANAT NEWS)