CEBU, Philippines - Magpinaksitay na ang Mega L.A. ug ACP Megabond sa ilang "knockout" match alang sa korona sa Lapu-Lapu Sports Club (LLSC) 2012 karong gabii didto sa Agus Gym sa Lapu-Lapu City.
Ang Mega L.A. nilang Lheo Almacin ug Marlon Llenes nakasulod sa finals human gipilde ang Aries Lending ni Tito Francisco sa iskor nga 87-83 sa pagpangulo ni Cutig, kinsa mipabuto og 22 puntos.
Sila si Pompy Ngujo ug Rene Cuadra mihipos og 14 puntos matag usa aron tabangan ang koponan pag-abante ngadto sa finals.
Ang napildeng Aries Lending gipangulohan ni Michael Almodal, kinsa mikimada og 19 puntos, gisundan ni Arnel Patalinghug sa iyang 12 puntos.
Sa laing bahin, ang ACP Megabond nakaangkon sab og lingkoranan sa finals pinaagi sa pagpilde sa Rulls Bakeshop ni Rupert Canizar sa iskor nga 71-64.
Ang team owner sa ACP Megabond nga si Neil Belga maoy nangunay sa pagpangulo sa kadaugan sa iyang koponan nga mibagdok og 23 puntos, gisundan ni Junjun Tampus sa iyang 13 ug Olan Velasquez nga adunay 12 puntos.
Gipangulohan sab ni Alan Sepe ang naparot nga Rulls Bakeshop nga miariya og 19 puntos, samtang sila si Edwin Amistad ug King Celiz misansan og 12 puntos matag usa.
Ang Mega L.A.-ACP Megabond showdown sugdan sa alas-8 sa gabii human sa duwa tali sa Rulls Bakeshop ug Aries Lending nga mag-ilog alang sa ikatulong dapit ning maong torneyo nga gipaluyohan sa Rollway Customs Brokerage ni Rolly dela Pieza, Roro Transport ni Roilan Sumilang, Alan Yu ug sa JB Sportswear ni Billy Nadado. (BANAT NEWS)