CEBU, Philippines - Gimakmak sa powerhouse team Jagobiao ang Cubacub sud sa straight sets aron langkaton ang 2012 Elderly Filipino Week Gateball Tournament.
Gipangulohan sa ilang team captain nga si Celestino Pioco, ang Jagobiao gateball team midaog sa Cubacub sa unang duwa, 21-9 ug nausban sa ikaduhang duwa sa sikit kaayong iskor, 11-10.
Ang Jagobiao nakadawat og P5 mil bugti sa ilang pagpanghawod sa torneyo, samtang ang Cubacub mibulsa og P4 mil. Ang Looc nga gipangulohan ni tournament coordinator William Sienes nga mipahiluna sa ikatulong dapit nakadawat og P3 mil.
Laing pito ka teams ang nakadawat og tag-P2 mil matag usa isip quarterfinalists, samtang ang ubang partisipanteng koponan nakadawat og consolation prize nga P1,000 matag usa.
Si Councilor Diosdado Suico, Gabby Mendoza, ang City Sports Coordinator ug uban pang mga konsehales ang mitunol sa mga ganti ngadto sa mga mananaog.
Kawhaa'g-tulo (23) ka gateball teams gikan sa Federation of Senior Citizens sa dakbayan sa Mandaue ang misalmot sa maong matang sa paugnat sa kusog nga gipasiugdahan sa Mandaue City Government ubos sa liderato ni Mayor Jonas Cortes ug sa Federation of Senior Citizens Official pinangulohan ni Benjamin Gahe. (BANAT NEWS)