Dupa

(Duaw Patigayon)

Atong pagasugdan puhon dinhi sa atong parokya ang pagduaw sa mga nagkadaiyang mga patigayon nga sakop sa Parokya aron pagdala kanila sa panalangin nga ilang gikinahanglan ug pagdasig kanila diha sa pagsimba. Nunot ning maong pagduaw mao man ang pagbendisyon sa ilang mga tindahan o paninda.

Sa laing bahin, gamiton usab nato kining maong kahigayonan aron sila matudloan nga bisan pa man kun kita ang tag-iya sa maong tindahan, angayan gihapon nato kining Ikonsagrar ngadto sa Dios pinaagi sa iyang Inahan nga si Maria Santisima. Busa ania kining maong pag-ampo sa pagkonsagrar sa mga Kabtangan ngadto sa Mahal nga Birhen Maria.  Kini pagaampoon sa tag-iya.

PAGKONSAGRAR SA MGA KABTANGAN NGADTO SA MAHAL NGA BIRHEN MARIA

Ako si (Isulti ang ngalan) walay pagtuo ug makasasala nagabag-o karong adlawa sa akong panaad sa bunyag.  Akong gisalikway sa kahangturan si Satanas uban ang iyang mga haylo ug buhat.

Akong ihatag sa kinatibuk-an ang akong kaugalingon ngadto kang Kristo Jesus, ang Kaalam nga Nagpakatawo, pagapas-anon ko ang akong krus ug mosunod kaniya sa tanang mga adlaw sa akong kinabuhi. Mas magmatinud-anon ako sa Ginoo kaysa kanhi.

Atubangan sa mga langitnong hugpong gipili ko ikaw O Maria nga mamahimong akong Inahan ug Agalon. Sayud ako nga nakadawat ako og katungod sa akong mga kabtangan pinaagi sa Balaod sa Kinaiyahan nga gilatid sa Diosnong Kalagdaan, akong ihalad ug ikonsagrar nganha kanimo ingon nga imong ulipon ang tanang mga kabtangan nga akong nahuptan, kagahapon, karon ug sa umaabot.

Akong gitugyan nganha sa imong mga kamot akong langitnong Inahan ang tanang kabtangan ug bahandi nga ania Kanako.

Lakip na niini ang akong kinabuhi, maayong panglawas, panalapi, mga relasyon ug kalambigitan, panginabuhian ug ang kalibutanong kalampusan.

Ako silang tanan itugyan nganha kanimo ug isalig ko sila nganha sa imong panalipod aron sa ingon walay bisan unsang dautan  ang  makapanghilabot kanamo ug sa among mga kabtangan. Sanglit sayud man Sila O Ikaw man ang tag-iya Mahal nga Inahan.

Dawata O Maayo ug Hamiling Birhen kining diyotay nga paghalad alang sa imong pasidungog nga gimbut-an ug nahiusa ngadto sa walay katapusang Kaalam. Alang sa inyong kadayganan kining ubos ug kabus nga makasasala mapasalamaton sa mga prebilihiyo nga nahatag nganha kanimo sa Santisima Trinidad.

Dako uyamot ang akong pagsalig nga ang Dios Amahan ug ikaw mopadangat sa Pag-amoma ngari Kanamo ingon nga akong Inahan. Sayud ako nga dili ikaw magpasagad sa akong mga panginahanglan ning kinabuhia.

Ang Gugma sa Dios magpatubo sa akong Pagsalig sa Pag-atiman sa Inahan sa Iyang Anak, O Birhen sa Makiangayong Gugma hatagi ako sa hingpit nga pagsalig sa pag-amoma sa imong anak. Amen