DENR ayaw pagduka!

Nakurat ko pagkasayod nga dunay laing mayor sa Mindanao nga gi-ambush ug swerte lang nga wa gihapon mamatay.

Si Mayor Ronito Martizano sa lungsod sa Barobo, Surigao del Sur nakangkon lang og gamay’ng samad, apil ang iyang Army bodyguard diha nga ang gisakyan nilang van girapido og mga bala sa armadong mga tawo.

Gituohan nga ang mga tawo nga gustong mopatay ni Mayor Martizano mga nalambigit og large scale illegal gold mining operation kay kusganon kini nga gisupak sa mayor ug gipasirad-an.

Daghan ang nakadayeg kang Mayor Martizano tungod sa hugot niyang pagsupak sa illegal mining operation. Kon gusto sila nga mag-mina, kuha og kompletong dukomento aron mahimong legal ang ilang gihimo.

Matud sa mayor nga human niya gihugtan ang kampanya batok sa mga illegal gold mining operation sa iyang lungsod, nakadawat na siya og mga hulga, ug kaniadtong Martes gi-ambush gyud siya.

Maayo nga hatagan og proteksyon sa mga polis, ug mga sundalo si Mayor Martizano kay nindot ang iyang katuyoan.

Kaniadtong miaging semana, ang mayor sa Shariff Aguak, usa ka lungsod sa Maguindanao, gi-ambush sab ug ang gigamit pa gyud nga armas usa ka Rocket Propelled Grenade.

Kadto hinuon nagtuo ko nga politika ang rason sa tinguha nga patyon ang mayor sa Shariff Aguak. Natan-aw tingali sa nagtinguha pagdagan nga lupig gyud siya, mao nga migamit na lang og inantigo nga paagi.

* * *

Dunay tabi-tabi nga mabuksan ra kuno’g balik ang labayanan og mga basura sa Barangay Binaliw, Cebu City. Daghan ang nangutana nako niini, apan dili ko makatubag.

Pero kon makapangita og maayong paagi ang Department of Environment and Natural Resources (DENR) nga kon ablihan pagbalik ang Binaliw landfill, kanang dili na makasupak sa balaod.

Karon ra ba, mireklamo na ang mga taga Barangay Panoypoy, Consolacion, ang kanait nga barangay sa Binaliw. Dugay na nga apektado ang ilang tinubdan sa tubig kay nagtoo sila nga ang duga sa basura mituhop na sa ilang mga tinubdan.

Kon tinuod man kini, angay nga tagdon dayon, apan ang pangutana unsaon pagsulbad? Nahibawo ko nga maglisud sila pagsulbad kay unsaon man nimo kon ang duga sa basura mituhop na sa yuta?

Mao nga kamo lagi diha sa DENR, ayaw gyud mo pagduka! Sutaa pag-ayo kon ang tagdumala sa landfill nakatuman ba sa gilatid nga mga lagda.

Dia pay lain ay. Hilom ra kaayo ni kay wa may baho nga moalisngaw. Kanang mga menteryo, sutaa kon wa ba kaha motuhop na sa yuta ang duga sa mga patay!

Di ba ang paghimo og menteryo hanigan man gihapon og baga nga liner? Gituman ba kana?