EDITORYAL - Mopaambit pud unta sa gasa

Walay hunong ang paghatud og mga hinabang sa mga nabiktima sa bagyong Tino diha sa mga kalungsorang nagrabehan sa pagbaha ug pagdahili sa yuta.

Apan subo lang palandungon nga dunay mga lugar nga toa sa suok, hilit ug  layo kaayo sa mga dagkong dalan ang wala pa maabot sa mga gikinahanglang hinabang.

Tungod sa gilay-on ug walay klarong dalan o nangaguba ang mga taytayan ug agianan, dunay mga naapektahan sa bagyo nga wala gyud makadawat bisan usa ka botelyang bottled water.

Dili dapat isipon nga ang mga gitawag nga biktima mao lang kadtong nalunopan, gianod, o nabanlas ang mga balay sa baha. Dili lang dapat sila ray tutokan sa mga hinabang.

Kay dunay daghang mga namuyo sa mga hilit nga lugar, wala man tuod mabanlas ilang mga panimalay o walay nakalas sa ilang pamilya atol sa katalagman, nga naapektahan sab niini.

Kanang pagkaputol sa mga taytayan, mga dalan nga dili maagian, walay linya sa kuryente o agas sa tubig, dako na kaayo kanang kawad-on sa normal nga kinabuhi sa mga namuyo sa hilit.

Bisan ang pag-adto nalang sa mga dagkong dalan diin moagi ang mga nanghatag og hinabang, lisud nilang buhaton. Bisan ang pag-adto sa ilang barangay kung dunay hinabang nga moabot dili nila mabantayan tungod kay walay mopahibalo nila nga dunay ayudang moabotay.

Apan diay daghang mga biktima nga naa ra duol sa mga dagkong dalan ang nabuhong sa mga relief goods, gani ang uban makatukod na og sari-sari stores sa kadaghan sa ilang nadawat.

Maayo lang unta pud nga kining halos kada adlaw nakadawat sa mga hinabang gikan sa gobiyerno ug sa mga pribadong tawo, mopaambit pud sa ilang mga katagi-barangay sa hilit.