Maghiusa gyud

Husto gyud si Kongresista Edu Rama sa iyang sugyot nga kinahanglang kita dinhi sa Cebu dunay pagamugnaon nga Metro Cebu Drainage Master Plan alang sa mga siyudad sa Mandaue, Talisay ug Cebu City.

Abi ninyo og ngano? Kinahanglang maghiusa ang kadagkoan sa tulo ka siyudad pagsulbad sa problema kabahin sa pagbaha ug paglunop sa tagsa-tagsa nila ka mga lugar.

Nahunahuna nako nga kining sugyot ni Kongresista Edu kabahin sa pagmugna og Metro Cebu Drainage Master Plan, susama ra sa akong sugyot nga unta ang mga opisyal sa Mandaue, Lapu-Lapu, Talisay ug Cebu City maghiusa pagmugna og Metro Cebu Traffic Management Plan.

Gipasabot ni Kongresista Edu nga ang paghimo og mga flood control projects mas mahimong malampuson kon dunay pagamugnaon nga Metro Cebu Drainage Master Plan, ug suporta ko niini.

Dili pa dugay, taas kaayo ang panahon nga gigahin ni Kongresista Edu pagpasabot sa mga kauban niyang kongresista atol sa usa ka session nila, kon ngano nga sa kadugay’ng panahon wa gyud hingpit nga nasulbad ang lunop.

Misamot nga nakontrobersyal kining isyu kabahin sa mga anti-flood control projects kay didto sa Luzon nasakpan gyud mismo ni Presidente Bongbong Marcos nga dunay mga budget sa anti-flood control project nga gibulsa ra sa mga kurakot nga opisyal.

Gani, ang district engineer sa Department of Public Works and Highways (DPWH) sa Batangas nadakpan gyud sa entrapment operation sa NBI kay gusto niyang pahilomon ang kongresista didto aron dili na mopadayon pagtuki sa anomaliya pinaagi sa paghatag og P3.1 million.

Ang maong district engineer sa DPWH mibutyag nga ang mga kongresista didto sa ila, magdawat diay og kickback gikan sa kwarta sa anti-flood control project. Resulta, binuangan lang ang proyekto, ug usahay dili tiwason apan sa dukomento, ibutang nga 100 percent na nga nahuman.

Dinhi sa Sugbo, dunay anti-flood control project sa Mandaue nga nahugno tungod sa kusog kaayong baha. Pero tan-aw nako, mora’g lahi dinhi sa Sugbo kon itandi didto sa kaulohan.

Sama ni Kongresista Edu, gitataw niya nga daghan siya og mga anti-flood control project, apan ang iyang trabaho mao ra ang pagtabang nga mapagahinan og budget ang proyekto, ug bahala na ang DPWH nga motrabaho, ug mangita’g kontraktor sa proyekto.

Didto sa Manila, ang mga kongresista gyud kuno ang magbuot kon kinsa nga kontraktor ang patrabahoon sa proyekto. Dinhi sa Cebu City south district, giawhag gyud nako si Kongresista Edu nga maninguha siya aron matabangan niya ang pagsulbad sa kanunay’ng pagbaha sa pipila ka dapit sa iyang distrito, kon mobunok na ang uwan.