Dili gyud molugak

Unsay sangpotanan niining pagkaaresto ni kanhi presidente Rodrigo Duterte ug pagdala kaniya ngadto sa  The Hague sa The Netherlands aron pagtaral kaniya sa International Criminal Court sa kasong crimes against humanity?

Wala ug tuo ang mga panawagan pagpabalik kang Duterte sa Pilipinas. Gani adunay mga petisyon sa Korte Suprema aron pag-order niini pagpabalik kaniya kay lagi ilegal kuno ang iyang pagdakop.

Tungod niini, daghang panawagan karon, ilabina sa mga supporter ni Dutrerte, alang sa pagpahagba sa administrasyon ni Ferdinand “Bongbong” Marcos kinsa gidudahan nga maoy mastermind sa paghakot sa kanhi presidente ngadto sa The Hague.

Apan bisan pa sa mga protesta sa ubang mga lugar sa nasud batok sa pagdakop kang Duterte, kuli nga mosangpot kini sa pagkahimugso sa People Power sama sa nahitabo sa 1986 EDSA Revolution diin napalagpot si Presidente Ferdinand Marcos Sr.

Kulang sa ingredients nga mahitabo kini. Ang unang lamas mao ang pagpanguna sa Simbahang Katoliko, ang labing impluwensiyadong relihiyosong organisasyon sa nasud. Sa pagkakaron mora'g walay gana ang simbahan nga mangulo na usab og laing rebolusyon.

Ang laing haligi alang sa laing malampuson nga people power mao ang dakong suporta sa militar ug kapolisan. Dli ikalimod nga maglisod gayud ang administrasyon kon mo-withdraw na gani ang militar ug kapolisan sa ilang suporta.

Tungod lagi kay atua na ang kanhi presidente sa The Hague aron pag-atubang sa iyang kaso sa hawanan sa ICC, dulom pa sa alkitran ang tsanta nga mabalik pa si Duterte sa Pilipinas niining panahona.

Sayang lamang kining mga protesta sa iyang mga tagasuporta. Kini gumikan kay bisan pa kon ka pito pa balibalihon ang kalibotan, dili gayud molugak ang ICC ug motugot nga hatagan og temporaryong kagawasan si Duterte.