Ang lungon ni Papa Francisco

Nagsud-ong ko sa lungon ni Papa Francisco human kini masilyohi ug mataboni aron andamon alang sa paglubong.

Wala kaayo daghang dekorasyon. Samtang nag-inusara kini ug ang mga katawhan sa halayo nagsud-ong apan ang maong talan-awon nagtudlo nato og mas dako ug halawom nga pagtulon-an alang kanatong tanan.

Kini naglangkob ning mosunod:

 1. Mas makaayo nga mokupot kita sa atong Magbubuhat nga mao ang Dios ug dili sa iyang mga linalang. Ang Dios lamang ang makapanalipod ug mag-igo kanato sa katapusan.

Mag-unsa man tuod kun mahuptan nato ang tanan apan mahikawan kita sa kahigayonan sa pagsud-ong sa panagway sa Dios?

 2. Ang Dios lamang ang atong hunahunaon ug pun-on nato ang atong hunahuna ug pagbati Kaniya lamang kini tungod kay Siya sa iyang bahin ang mohunahuna pud kanato.

 3.  Ang tinuod nga kaambong anaa sa kayano ni ang tinuod nga kapuno anaa sa kahaw-ang.

 Bisan pa man kun sa kaulahian si Papa Francisco wala na kaayo motingog gumikan sa iyang balatian apan nagpabiling sibaw ang pagtulon-an nga dinhi sa kalibotan dili maayo nga mag-agap sa bisan unsang lumalabay.

 Sanglit ang tanan, bisan gani ang dungog ug gahom mahimong talikadan lamang. Salamat Papa Francisco ning maong pahinumdom ug sanglitanan.

Ang bahandi nga mahimong maangkon dili diay alang lang sa kaugalingon kondili alang usab sa uban dili diha sa igong kasayon ug kataspok kondili aron sila nga nakadawat ang motabang usab sa ilang kaugalingon. Viva el Papa!