Pagsulbong ug pagtidlom
Maayong balita para nilang kanhi Senador Bam Aquino ug kanhi Senador Kiko Pangilinan ang labing bag-ong survey sa OCTA Research Group. Nga gihimo atol sa semana nga nagpa-endorse ni Bise Presidente Sara Duterte ang duha ka kandidata sa administrasyon nga silang Imee Marcos ug Camille Villar.
Taas ang layat sa ranggo ni Bam gikan sa ika-15 sa OCTA survey sa Marso ngadto sa ika-11 sa survey nga gihimo niadtong Abril 10-16 karong tuiga. Nisaka sab ang ranggo ni Kiko gikan sa ika-16 sa Marso ngadto na sa ika-14 sa Abril.
* * *
Tulo ka administration candidates ang naapsan ni Bam: Silang Benhur Abalos (nga natagak gikan sa ika-14 ngadto sa ika-16), Manny Pacquiao (nis-us-os gikan sa ika-12 ngadto sa ika-13) ug Camille (gikan sa ika-11 ngadto sa ika-12). Gilakangan sab niya ang independent candidate nga si Willie Revillame (nga nahagbong gikan sa ika-13 ngadto sa ika-15).
Duha ang naapsan ni Kiko: Silang Revillame ug Abalos. Gani, nagtabla na silang Pacquiao nga pulos dunay 30.3% nga voter preference. Si Bam nakaangkon og mas dako nga 32.3% nga suporta sa respondents.
* * *
Daotang balita para sa mga Villar ang survey: Nihiyos ang voter preference ni Camille gikan sa 35% sa Marso ngadto na sa 30.4% karong Abril. Sayo pa hinuon pagdeklarar nga napakyas ang endorsement ni Sara pagpasulbong sa iyang kandidatura ug nga nakaiban hinuon sa suporta gikan sa mga dumadapig sa administrasyon.
Mahimong sa adlaw na sa eleksiyon mahibaw-an madugangan bang iyang mga boto sa giisip nga teritoryo sa mga Duterte sa Mindanao ug Central Visayas.
* * *
Makapadasig og dyutay ang resulta sa survey sa mas desperada sa suporta ni Sara nga si Imee: Pulos nisaka ang iyang ranggo gikan sa ika-18 sa Marso ngadto sa ika-17 sa Abril ug voting preference gikan sa 27% sa Marso ngadto sa 27.9% sa Abril.
Makapa-alarma hinuon ni Imee ang mas dakong layat nilang Bam ug Kiko. Nga makapalig-on sa mga huhungihong nga, bisan sa tanang pa-goryo-goryo sa Malakanyang, silang Bam ug Kiko maoy ikarga sa sample ballot sa administrasyon puli nilang Imee ug Camille. Aron pagsegurong madugangan ang mga mo-konbikto ni Sara sa impeachment trial.
* * *
- Latest
