Hain na ba ang First Lady?

Luyo sa kadaghan na sa mga hulagway ug pipila ka video nga nagpakita sa hitsura ni First Lady Liza Araneta-Marcos sa nagkalainlaing media outlet aron pagmatuod sa gianunsiyo ni Palace Press Officer Claire Casto, nga ang First Lady, alas 5:00 pasado sa buntag, Lunes, Marso 10, 2025 miabot sa Pilipinas, daghang mat-ang nagpakabana ang wala gihapon motuo.

Si Liza, matud pa, mitambong og Manila International Film Festival (MIFF) didto sa Waldorf Astoria, Los Angeles, California, petsa Marso 5-8, 2025. Apan sa wala palandongang hitabo usa sa iyang mga nakaubang adunahan-dagkong tawo sa ilang pagpangaon og dinner sa usa ka mahalong restawran, si Juan Paolo Tantoco, tag-iya sa Rustans, namatay sulod sa hotel pagka sunod adlaw, Marso 9, 2025, human sa maong panag-uban nilag panihapon.

Diin, higpit giimbestigahan sa mga otoridad sa LA ang maong hitabo.

Kay nganong gipalabay pa sa nagpahibalo og siyam ka oras gikan sa pagkamatay niini, ayha pa kini gir-eport?

Ang makaintriga, kay adunay mga Pilipino nga atua na puyo sa LA ug misulod usab sa samang kan-anan nga bisan nahimulag ilang lamesa sa nahimutangan sa grupo ni Liza, nakahigayon gihapon ang usa kanila pagkuhag video ni Liza, diin anaa si Tantoco sa iyang tupad ug ubang suod-kahigalaan, malipayong nangaon.

Unya, gi-post sa maong Pinoy sa social media ang video footage nga iyang na-record aron kuno paghatag og ideya nga kon unsay gisulti ni Castro, kinsa mipasiatab nga si Liza nahiuli na sa Pilipinas, kini dili tinuod.

Kay 16 oras kuno ang biyahe gikan LA ngadto sa Pilipinas. Ug kon si Liza nakauli pagka-Marso 9, wrong mathematics kuno!

Dali rang mikatap ang maong video nga gikuninitan sa mga content creator, netizens ug vloggers.

Maoy nakapadudag samot sa mga nagmabinantayon, diin bisan giunsa pagpakitag mga retrato-video ang katawhan pagpruyba nga si Liza ania na sa Pilipinas, daghan gihapon ang dili magpailad.

Ug mahanaw-masulbad lamang kining tanan, kon adunay fresh press conference, diin mosulti-live si Liza ug ipanghimakak nga na-hold siya sa LA kay biktima lamang siya sa fake news. Dapat, mao kini ipresentar ni Castro sa publiko.

Magpunay man hinuo'g tira sa mga Duterte. Kaanugon, sa atong gisuweldo niya!