Epidemiya sa social media

Sa una, ang telebisyon maoy nag-una nga tinubdan sa impormasyon ug kalingawan. Bisan pa man sa kalapad sa abot niini, kini regulado ug adunay mga limitasyon. Adunay mga pahimangno: Parental Guidance nga nag-awhag sa mga ginikanan pagbantay sa ilang mga anak, labi nag mga mendor de edad pa, aron malikayan ang dili angay nga mga programa.

Karong panahona, mitungha ang social media sama sa Facebook Reels, TikTok, YouTube, ug mga streaming platform sama sa Netflix, nga nakapabalhin sa tanang pamatasan sa media. Tungod niini, dali na kaayo ang pagpunta-sulod sa bisan unsang klaseng pasundayag sa walay pagpakabana kon kini angayan ba, o dili?

Ang paningkamot sa mga influencer aron makakuhag daghang views ug ads monetization nagresulta nga kadaghanan sa mga sulod niini walay pulos, usahay delikado ug sayop pa gyod.

 Usa ka reel nga akong nakita, mi-post og mga “life hacks” nga klarong binuang ug ginahimong kataw-anan ang uban. May ubay-ubayng cooking shows walay klarong resipe nga naghatag lag sayop impormasyon nga makalibog sa mga nanan-aw.

Mas grabe, kay may mga influencer nga halos maghubo na lang samtang naglaba. Unsa na man ni?

Ang atong kabataan-kabatan-onan pirmeng nakatutok sa screen, way kontrol. Dili pareha kanidadto nga ginadili ang TV ug gadgets gawas lang sa weekend o sa tukmang oras. Karon, halos tanan walay limitasyon ug bisan unsang oras pwede na magtan-aw ug mag-scroll.

Asa na ang disiplina ug ang responsibilidad sa paggamit niini? Kay baya, daghan na karong siyentipikanhong pagtuon ang nagpakita nga ang sobra nga paggamit sa gadgets konektado sa depresiyon, pagkabalaka, ug dali ra kaayo masuko ang dili na mapugngan nga panghunahuna. Apan bisan pa niining inderiktang epedimyang mikatap na sa atong nasod, wala gihapoy lihok-aksiyon atong kagamhanan aron kini mapugngan.

Kinahanglan ang epektibong regulasiyon. Pwede ra ang kalingawan pero kinahanglang adunay tukmang limitasyon. Dili lamang atong gobyerno maoy responsible. Kondili, kita tanang ginikanan ang may dakong obligasiyon sa pag-alim ning maong matang sa epidemiya.

Kay kon magpadayon kini, mawala ang mga maayong pamatasan nga ginatudlo ug napanunod ta gikan sa atong mga katigulangan.

Usab, ang kaugmaon sa atong nasod, atong kabataan ug nanagsunod natong henerasiyon maoy maalaot.

Unta, mapugngan kini!