Pataka la’g upload

Dili ikalimod nga nagkadaghan ang mga libelous nga posts ug mga libelous nga mga hulagway nga gipang-upload sa mga netizens diha sa social media.

Tingali, ang uban kanila wa masayod nga sa ilang gihimo posibleng mag-atubang sila og problema kon pasakaan na sila og kaso sa mga hingtungdan nga gi-target nila sa ilang mga posts.

Si Presidente Bongbong Marcos giingon nga modawat og mga pagsaway kaniya gikan sa publiko, apan kon pasubrahan na sab nga mora’g supak na sa balaod, basin og ang kagamhanan na ang mohimo’g lakang.

Timan-i nga gitataw ra ba gyud sa Supreme Court sa daghan na nga mga desisyon, nga “Truth is not a defense of libel” basta gihimo na kini aron pakauwawan ang usa ka tawo.

Dunay post nga nakit-an nako nga lalaki ang uploader. Nag-video siya ug nidayeg pag-ayo ni kanhi Presidente Ferdinand Marcos kay gipakita man niini ang hulagway ni Imelda Romualdez sa dalaga pa, nga gwapa kaayo.

Gipakita niini nga naglakaw si Imelda ug naggunitay ug si Ferdinand Marcos nga nindot kaayo tan-awon. Apan gitandi niya ug gipakita ang hulagway ni First Lady Liza Marcos nga nagkindang-kindang ang nilakwan niini.

Unya, ang video upload sa Facebook gibutangan pa niya og “Penguin-like Walk” dungan sa pagsige’g katawa nga bugal-bugal. Para nako, dili na maayo ang maong post kay usa na kini ka “bully” ngadto kang Liza Marcos.

Ang Meta nga maoy kompaniya nga nagdumala sa Facebook dunay mga Artificial Intelligence softwares nga sarang magamit unta aron nga ang mga dili maayong post, dili ma-upload sa ilang platform.

Apan napakyas sila paghimo niini. Aw, hinuon, ang balaod karon ang mga post diha sa Facebook pwede na nga gamitong ebidensya batok sa mga tawo nga makahimo og kalapasan sa balaod.

Mao na kamong mga dumadapig sa duha ka habig, ma pro-Bongbong man o kaha anti-Duterte, kalma ra gyud ug sa dili pa kamo mohimo sa gusto ninyong himoon, hunahunaa kon dili ba kamo magmahay sa kaulahian.

Mailhan ra ba gyud kon kinsa ang nag-post kon tinud-on mo paggukod sa kagamhanan. Usbon nako ang pag-ingon nga kining social media nindot kaayo kini kay bisan ang dili tinuod nga Media, mahisama na og media.

Ang nakalahi lang sa ubang netizens, gawas sa mga nahibawo sa balaod, kay sila magpataka lang pag-post, apan inigkasayod nila nga mahimo silang makiha sa ilang gipang-post, abtik kaayong maka-delete sa ilang gipang-upload.

Pahimuslan nato ang social media pinaagi sa tukmang paggamit ug dili kay gamiton kini sa pagbugal-bugal ug pagpakauwaw sa usa ka tawo nga inyong gikalagotan.