Tingog milanog: “Bring PRRD home!”

Sakit man paminawon nga daghan ang nag-ingon: ‘Ang kasamtangang presidente sa Pilipinas huyang, walay baroganan, bakakon, mangingilad ug uban pang negatibong komentariyo.’ Kini, angay dawaton-agwantahon! Sanglit sa hapit na motulo ka tuig niyang pagpangalagad, mao man kini ang iyang gipakita sa katawhan.

Samot na niining nahitabo karon, diin ang tanang nagmahal ni kanhi Presidente Rodrigo Roa Duterte (PRRD) daw mga anak nga gikawatan sa ilang atubangan og usa ka mapinanggaon-buotang amahan, kinsa ang mga mipasipala, kaugalingon ra natong kapolisan, atong kadugo, kinsa mao pay mitugyan ni Tatay Digong ngadto sa banyagang nasud, International Criminal Court, The Hauge, Netherlands, aron imbestigahan ug prisohon tungod sa gipasangil nga ‘crimes against humanity’.

Diin, dinhi man unta sa Pilipinas mahitabo ug nganong gipasa man sa administrasiyong Marcos ngadto sa langyawng korte nga aduna man kitay kaugalingong hukmanan dinhi? Dili ba, klaro kaayong binuang ug dakong insulto sa atong nasudnong sovereignty?

Nganong wala man kabadlong si Pres. Bongbong Marcos, nga hasta kapila na man siya makapahibalo sa publiko nga dili mahitabong makasulod ang ICC dinhi sa ato aron gukdon si PRRD kay wala kini hurisdiksiyon?

 Naanad na ba lang gyod diay siya sa pagpanglingla aron matakpan ang tinuoray'ng hitsura sa iyang pagkatawo?

Tan-awa, unsay resulta? Nag-wild ang gisakitang 32M kapin nga diehard Duterte supporter (DDS) sulod ug gawas sa atong nasod. Daw bagang panon sa maisog nga manggugubat, nagmartsa sa kadalanan dala ang mga plakards, tarpaulins, megaphones, cameras ug ubang video materials nga maoy gihimo nilang hinigiban, dungan ang pagpalanog sa kinakusogan nilang tingog: “Bring PRRD home! Bring PRRD home!..”

Sa Liwasang Bonifacio, diin may dakong rally, gipakita didto sa telon ug gianunsiyo sa host nga 17 ka dapit sa Luzon-Visayas-Mindanao ang nagdungan pagpahigayon og samang rally-protesta, diin sa matag lugar, makita ang dakong lawod sa katawhang misalmot. Kini walay labot sa nagbahang panon sa OFWs sa nagkadaiyang nasod, kinsa puro emosiyonal nga miduyog sa maong kalihokan ug midaklit pagpahibalo nga silang tanan,  mo-vote straight gayod sa PRRD lucky 9 senatorial candidates.

Buhing ebedensiya, nga kusog ug inilog kaayo ang Team Duterte. Ug tikas ray makapilde! Apan yuna, ning administrasiyong dili patas, kasaligan pa ba ang Comelec?