Dagway sa kalisod

Laing lalaki ang natanggong sa sulod sa imburnal sa downtown area sa dakbayan sa Sugbo niadtong adlawng Domingo sa buntag human misulod siya kay nangita og sinsiyo sa kanal.

Giingong nisulod siya sa usa ka bangag sa kanal gikan sa usa ka dakong unibersidad duol sa Carbon ug misubay padung na sa dakong tindahan sa Colon, mga 500 meters matud pa ang gilay-on hinungdan nga naluya ug nalipong kini.

Dihang nakakita siya og bangag, mogawas na unta siya apan nay tabon nga puthaw.

Naglisod na siya sa pagtingog kay naluya naman apan naningkamot nga mapangayo og tabang.

Maayo nalang kay nadungog siya sa usa ka tawo ug mao na ang mitaho sa mga enforcer nga naa niadtong higayona sa maong dapit ug nanawag usab og rescue nga daling miresponde ug naluwas ang maong lalaki.

Dala pa niini ang plastic bottle nga dunay sulod nga mga sinsiyo hinungdan nga nagmatuod nga nangaykay gyud og mga sinsiyo ang maong lalaki.

Hapit mapilde ang iyang kinabuhi bugti sa sinsiyo nga iyang makuha unta. Ingon niini nalang gyud ka desperado ang tawo nga mohimo niini aron makasugakod.

Maayo nalang kay walay nahitabong dautan niining 39-anyos nga lalaki kinsa gidala pa sa tambalanan apan mipirma og waiver nga dili magpa-admit kay maayo na kuno ang iyang paminaw.

Nahadlok lang gyud siya nga makabayad og dako sa mga tambal sa hospital hinungdan nga gipili nalang niya nga dili magpa admit.

Pipila ka semana ang nakalabay, usa ka 15-anyos ang nahuot ang bukton sa takob sa imburnal kay gipasabok niini ang kamot nga mikuha unta sa sinsiyo nga natagak. Mikabat og lima ka oras ang pag-rescue sa batan-on maayo nalang kay milampos ang rescue operation ug wala maputol ang kamot niini.

Alang sa uban kataw-anan ang nahitabo kanila. Apan angayan nga seryoson ang paghatag og pagtagad sa ilang kahimtang kay dili nato sila kahukman sanglit kinabuhi man ang gibutang nila sa peligro aron makaagwanta sa nasinati nilang kalisdanan.

Sila ang dagway sa kalisod nga anaa ra gyud makita nato bisan sa pusod sa usa ka malamboon nga dakbayan. Ingon niini na ba ka grabe ang sitwasyon sa kalisod sa syudad?

Kong sila ang papilion dili gyud sila mohimo niining buhata kay baho, hugaw ug delikado kayo.

Apan tungod kay wala na silay kakuhaan sa ilang panginahanglan misugal sila sa ilang gihimong panimpalad sa ilawom sa imburnal.

Angayan kining hinuktokan kon si kinsa man ang gitahasan sa pag atiman niining isyu sa kalisod.

Ang uban mohukom dayon nga basin nihimo ra og eksina ang mga lalaki aron hatagan pud og kwarta sa gobiyerno sama sa babaye sa imburnal didto sa kaulohan nga subject gani sa binuang nga misulod lang sa imburnal paggawas nakakwarta na og liboan nga salapi.

Posible ingon niini ang tumong nila apan tungod gihapon sa kalisod sa kinabuhi ila kining nabuhat.

Kini ang angayang tutokan sa kagamhanan nga mahatagan og pagtagad inay sa mga isyu nga walay kapuslanan nga gihimong granstanding moment sa mga opisyal sa kagamhanan.