Kanus-a mahimong dautan ang relihiyosong mga butang

Sa unang pagtan-aw sa mga Butang Relihiyoso gyud ug Katoliko nga Kahimanan sa Debosyon. Maglisod kita og tuo nga ang rosaryohan, imahen sa mga santos, medalyon ang mahimong kahimanan diay nga yawan-on. Ning paagiha kinahanglang tukion gyud ang motibo sa naggama niini. Ang motibo sa naggama maoy maisip nga sukaranan sa atong paghukom.

Ang prinsipyo nagtudlo nga ang nagbuhat bisan pa man kun ang iyang binuhat iyang ibaligya, ang adunay kalambigitan sa  butang nga iyang gibuhat. Ang usa ka larawan nga gikulit bisan pa man kun imo kining gipalit gikan sa maong tigkulit aron imong gamiton sa personal nga katuyoan, sa kaulahian nalambigit gihapon ang maong butang ngadto sa nagbuhat niini. Molungtad ang tumong sa nagbuhat.

Sama pananglit sa mga Satanic Rosaries. Dunay mga simbolo (sigil) nga pentagram ug kadtong bitin nga nipaak sa may liog sa nagbitay nga Kristo sa Krus. Bisan pa man kun kini pagabenditahan sa pari ang nahaunang intensiyon sa nagmugna magpabilin. Busa kinahanglang gub-on ang maong rosaryohan o dili ba kaha dauban. Dili mahimong benditahan ang satanic rosary sa kapasikaran nga ang iyang timaan dili man katoliko ug nahauyon sa katolikong katuyoan kondili katuyoan man sa usa ka Satanic Manufacturer.

Ang mga paganong templo sa kakaraanan ang sa dili pa ikabig ug gawion alang sa Kristohanong katuyoan ug tumong ang pagagun-obon lakip na ang mga paganong mga timaan ug mga simbolo sulod niini ug kinahanglang kuhaon gikan sa maong dapit.

Ang maong mga paganong mga templo ang moagi gyud una sa mga pag-ampo ug eksorsismo. Ug human sa mga purification rites pagahimoon ang konsagrasyon aron mamahimo kining angayan sa Kristohanong Pagsimba. Ug kun ugaling ang maong dapit mahiagom sa panghitabo nga gitawag og desecration pagahimoon ang purification rites apil na niini ang mga panghimayad kun reparation dayon rededication.

Sa dili pa kita modawat o mogamit og mga relihiyosong mga imahen, mga larawan, rosaryohan  o medalyon, mahinungdanon kaayo nga susihon gyud ug kun walay igong katakus sa paghubad sa mga simbolo, duol sa mga maantigo niini.

Sa laing bahin, dunay mga imahen nga dunay mga yawa nga naapil. Sama pananglit sa imahen ni San Miguel Arkanghel nga nitunob sa ulo sa yawa o sa Mahal nga Birhen nga nitunob sa ulo sa bitin, mahimo silang benditahan sanglit ang maong mga larawan kun imahen nagpakita man nga dili mahimong modaog ang gahom sa kangitngit batok sa kahayag.