Mapahimuslanon sa higayon

Husto kaayo ang awhag sa kadagkoan sa Department of Social Welfare and Development (DSWD) nga ang mga politiko dili gyud motambong sa distribution sa mga financial assistance sa kagamhanan.

Para nako, ang mayor exempted sa maong lagda bisan pa og nagpasubli siya pagpapili sa iyang katungdanan tungod kay siya man maoy pangulo sa local government units.

Ang konsehal nga maoy gitugyanan sa pagdumala sa Committee on Social Services mahimo ra sab nga makatambong, apan kadtong uban nga opisyal nga wa gyuy labot, dili angay’ng motambong.

Labaw na nga unta may delicadeza ug kauwaw kadtong mga nagpapili pa lang sa katungdanan ug moadto aron modiskurso atubangan sa mga modawat sa benepisyo, unya manglamano.

Pagka way uwaw niining mao nga mga politiko. Nalipay ko kay dinhi sa Cebu City, dihang gipanghatag ang bonus sa mga barangay workers, wa gyuy bisan usa sa mga konsehal nga mitambong aron mangampanya.

Duna hinuo’y duha ka mga bag-o pa nga kandidato nga midiskurso ug nanglamano sa mga tawo. Tan-aw nako sa uban nga gipanglamano, nagkulismaot ang mga nawong.

Nahukman nako nga dili lang ibutyag ang mga ngan sa maong mga kandidato kay basin og wa ra sila mahibawo sa lagda, apan sa sunod kon ila pa gihapon nga buhaton, mapugos na ko sa pagbular sa ilang mga nga’n.  

* * *

Akong dasonan ang awhag ni Undersecretary Claire Castro ngadto sa mga wa gyud tawo’y kasinatian sa trabaho sa usa ka senador unya nangambisyon sa maong katungdanan nga dili na lang unta sila modayon.

Ang nindot bitaw kanila mao nga moagi usa sila og mga katungdanan sa lungsod, siyudad o kaha sa mga probinsya, usa sila modagan pagka kongresista ug ilabi na ang pagka senador.

Tan-awa ra gud ang pipila nato ka senador nga wa gyuy alamag sa trabaho isip magbabalaod, igo ra gyud tawon nga nagpasinaw sa lingkoranan kay maglisud man gani kon pakighinabian sa media.

Di ko makalimot nga dunay senador nga mianhi sa Cebu dugay-dugay na, ang iyang staff mipahimangno gyud sa mga media nga dili mangutana og eningles ngadto sa iyang boss, kay maglisud kuno’g sabot. Tagalog lang kuno.

Mao to nga gituman sa mga media nga iyang gisultihan. Apan dunay media nga nauwahi ug wa maapil sa gipasidan-an, mideritso og pangutana nga nag-eningles, kay senador lagi ang gi-interview.

Nagkanga-kanga ang senador nga wa gyud makatubag, ilabi na nga tigpasinaw ra sa lingkoranan ang iyang trabaho. Kaila tingali mo niya no?

Maayo unta og makahunahuna kining maong mga gustong mag-senador ug mag-kongresista nga wa gyud tawo’y alamag sa trabaho pagka magbabalaod.