Walay misagop

Walay nasudnong partido nga misagop sa kandidatora sa pagka mayor ni Cebu City Mayor Raymond Alvin Garcia. Buot ipasabot niini, ang lokal lang nga partido nga Kugi Uswag Sugbo o KUSOG nga gitukod kaniadto sa iyang amahan ang iyang sandigan.

Hinuon, wala siya mag inusara kay wala pud ko kadungog sa kandidatura Councilor Nestor Archival sa pagka mayor nga giindorso og nasudnong partido gawas sa gisandigan niini nga lokal nga partido nga BOPK nga gipangulohan sa iyang kandidato pagka bise mayor nga si kanhi Cebu City Mayor Tomas Osmeña.

Sila si former mayor Mike Lopez Rama nga magpapili usab sa pagka mayor giindorso ug giisa ang kamot niini ni kanhi presidente Rodrigo Roa Duterte ug si kanhi Customs Commissioner Yugi Ruiz giindorso sa partido Federal ni President Bongbong Marcos Jr.

Buot bang ipasabot niini nga walay nasudnong partido nga nakaila ni Mayor Raymond  Alvin Garcia?

Makatabang baya ang pag-indorso og kandidato sa tawo nga inpluwensiyado.

Sa akong nahibaw-an adunay mga kapitan nga mibali ngadto ni Mayor Garcia tungod kay nagt7o sila nga mao kini ang iindorso ni Presidente Bongbong Marcos. Unsaon man ni ron nila? Manabon nalang kay nabasa na o maglumbaanay sila pagtabok ngadto ni Yugi Ruiz.

Sa laing bahin, kinsa kaha sa mga kandidato pagka mayor ang mogawas nga mananaug sà Mayo 12 nga eleksiyon?

Kun imong tan-awon sa upat ka kandidato pagka mayor tulo kanila ang taga Norte samtang usa lang ang taga South. Ang Norte adunay 46 ka barangay samtang ang South aduna kini 34 ka mga barangay pero mas daghan kini og botante kay sa Norte.

Sila si Yugi Ruiz, Nestor Archival ug Raymond Alvin Garcia pulis taga Norte busa tulo pod sila nga magbahin sa boto sa Norte. Si kanhi Mayor Mike Rama lang  ang nag-inusarang kandidato sa pagka Mayor nga taga South.

Bisan dili na mangampanya si Mike sa Norte basta solido lang nga mobotar kaniya ang taga South, makabalik na siya sa City Hall basta dili lang siya tikason. Kining ako tinamban lang nga pagtan-aw nga nakabasi sa independente nako  nga pagsabot. Seguro dili ta pariha og pagtanaw ug nakaseguro ko nga lain pod nang inyo.