Problema dili maayong tagoon

Angay gyud nga gahinan og dugang pundong salapi ang pagpatukod sa bag-ong building sa Cebu City Medical Center kay pwerteng dugaya na niining maong proyekto nga wa mahuman.

Ambot og pila na ka bilyon ka pesos ang nagasto sa Cebu City government sa pagpatukod niining bag-ong CCMC building. Nindot unta og ang nagdumala niini karon mohimo’g kwentada.

Nagbanus-banos na lang ang mga mayor sa siyudad nga nagpatuman sa pagpatukod sa bag-ong CCMC, pero wa gihapon kini mahuman.

Ang nagsugod sa pagpatukod niini mao si kanhi mayor Michael Rama, dayon mibanos si kanhi mayor Tomas Osmeña, dayon si kanhi mayor Edgar Labella, mibalik si Rama, ug karon si Cebu City Mayor Raymond Alvin Garcia na sab ang mopadayon.

Ang original nga plano ni Rama pagsugod pagtukod ning maong proyekto mao nga napulo ka andana ang maong hospital building, apan tungod sa dinaliang panginahanglan ug tungod sa kakuwang og budget, tulo ra ka andana ang nabuksan.

Nakaanha ko sa maong ospital, nakita nako nga daghan kaayong problema nga angay’ng atimanon. Angay nga ang modumala sa CCMC kadto gyud nga tawo nga makatutok sa mga problema ug may tinguha pagpalambo sa ospital.

Ambot motoo ba mo kon ingnon nako nga dunay mga donated medical equipment para sa CCMC nga wa gani mapahimusli base ni sa report sa Commission on Audit.

Dihang nakaanha ko sa CCMC kaniadtong miaging tuig, nasayran nako nga dunay mga special medical units nga wa mag-function kay walay mga operator nga maka-operate sa medical equipment.

Kon hatagan ko og higayon nga mahinabi nako ang tagdumala sa CCMC, tingali daghan pa nga problema nga akong mahibaw-an ug makagiya kini kang Mayor Raymond Garcia nga mahatagan og pagtagad ang problema.

Ambot og anaa pa ba kaha kining problema diha sa Intensive Care Unit (ICU) nga makadawat unta kini og 16 ka pasyente, apan katunga ra ang ilang dawaton kay kuwang og nurses nga gidestino sa ICU.

Unya, diha gyud ko nga nag-uwan sa maong higayon, sus, nagbusagak ang tubig paingon sa ICU ward. Tagbaw tawon og sawod ang mga tagtungod sa pasyente.Ang nindot gyud nga dili nato tagoon ang mga problema sa CCMC, ato kining itug-an sa mayor, aron masayod kini ug kahatagan niya’g sulbad.

Idiga nato ang problema nga kamong mga tagdumala sa ospital dili makasulbad nga kamo-kamo ra. Apan kon ang problema madala ra ninyo’g sulbad, kana, ayaw na ninyo’g pahibnaw-a pa ang mayor.

Kon gusto mo, mobulontaryo ko sa pagsusi diha sa tambalanan kon unsay angay’ng aksyonan aron makatabang nga masulbad ang mga problema pinaagi sa pagpadangat niini ngadto sa mga opisyal nga hingtungdan.