Dugo sa ilang kamot
Mga senador nga nagsusi kon nayatakan bang mga katungod ni kanhi Presidente Rodrigo Duterte sa paspas nga pagbalhog niya sa prisohan sa International Criminal Court (ICC) sa The Hague mas angayng mosusi sa kapakyas sa ilang institusyon sa pagbadlong sa extrajudicial killings (EJKs) sa drug war ni Duterte.
Usa nila, nga nagpatuo nang embahador sa Ginoo, dunay dugo sa iyang kamot. Apil si Senador Alan Peter Cayetano sa 16 ka senador nga nisabotahe sa imbestigasyon niadtong 2016 nga makabadlong unta sa mao pay pagsugod nga EJKs.
* * *
Si kanhi Senador Leila de Lima nagpasiugda sa imbestigasyon pinaagi sa iyang Committee on Justice and Human Rights. Gipaminaw sa komitiba ang testimoniya ni Edgar Matobato kinsa nikumpisal nga berdugo sa Davao Death Squad (DDS) ug ni-detalye sa EJKs nga gisugo ni Duterte niya.
Imbes suportahan ang imbestigasyon, gipalagpot si de Lima isip pangulo sa komitiba ug giabsuwelto si Duterte nilang Cayetano ug kaubanan: Koko Pimentel, Migz Zubiri, Cynthia Villar, Win Gatchalian, Joel Villanueva, Nancy Binay, JV Ejercito, Loren Legarda, Grace Poe, Sonny Angara, Tito Sotto, Ping Lacson, Gringo Honasan, Dick Gordon ug Manny Pacquiao.
* * *
Bisan sa pagsupak nilang de Lima, Risa Hontiveros, Frank Drilon, Kiko Pangilinan, Bam Aquino, Ralph Recto ug Sonny Trillanes, gilaktod sa mga senador pagtapos ang imbestigasyon ug gideklarar si Matobato nga bakakon.
Giunsa kaha pagsagang ang sukmat sa ilang konsiyensya dihang niabot na og kapin sa 30,000 ang mga biktima sa EJKs? Kublan sila kay walay usa nila nga nangayo og pasaylo sa pakigkonsabo sa bangis nga pinatyanay sa atong panahon.
* * *
Si Matobato nga ilang gisalikway siyam ka tuig ang nilabay gihatagan sa ICC og bag-ong ngalan, gipahimutang og mas luwas nga pinuy-anan ug karong napriso na si Duterte giandam sa husay uban nilang Arturo Lascañas, sa laing wala pa ilha nga haligi sa DDS ug sa nagbangotan nga mga paryente sa mga biktima sa EJKs.
Pero silang Cayetano ug kaubanan wala mopakita og bisan gamay na lang nga paghinulsol. Bisan makahimo na unta pagbisto sa mga Duterte human nabungkag ang UniTeam, padayon silang nag-ulog-ulog sa mga dumadapig sa nagkabangga nga mga dinastiya. Para nila, mas importante ang pamolitika kay sa hustisya.
* * *
- Latest
