Unsay katungod sa live-in partner sa properties

Dear Atty. Divine,

Adunay koy live-in partner apan wala mi anak. Lima ka tuig na mi nga nagtipon ug aduna mi napalit nga mga properties tungod sa among ginagmay nga negosyo. Ang ubang properties nakapangan namong duha, apan ang uban nakapangan sa ako lang kapuyo. Ang akong pangutana kun aduna ka akoy katungod sa maong mga properties bisan kon kini nakapangan lang sa iyaha? Daghang salamat.

Loida

* * *

Dear Loida,

Basi sa Article 147 sa atong Family Code, kini nagkanayon nga kun ang usa ka babaye ug lalaki magpuyo sama sa usa ka magtiayon apan dili kasal, ang ilang sweldo makonsiderar nga gipanag-iya kanilang duha. Samtang ang bisan unsang kabtangan nga ilang mapalit atol sa ilang panagtipon gipanag-iya sab kanilang duha. Buot ipasabot nga ang bisan unsang butang nga mapalit sa manag live-in partner atol sa ilang panagtipon gi presumed nga ilang duha. Ug kun pananglit ang usa kanila walay natampo nga kwarta sa gipalit nga property apan siya ang nag-atiman o nag manage sa ilang pamilya o pinuy-anan, makonsiderar kini nga maoy iyang contribution busa aduna gihapon siyay katungod sa maong property. Sa imo kaso, kun ang property gipalit sa imong kapuyo atul sa inyong panagtipon, aduna kay katungod niini bisan kun kini nakapangan lang kaniya.

Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.