Padayon ang pagpamupo og daghang dolyares ni kanhi three-time World Boxing Division champ Johnriel ‘Cuadro Alas’ Casimero ibabaw sa ring human niya kastigohag mga solidong suntok si Saul Sanchez, usa usab ka lig-ong Amerikanong boksidor, kinsa kaduha niya manakdawon hangtod na-standing knockout didto sa Yokohama, Japan niadtong Oktubre 13, 2024 sulod lamang sa unang rawon.
Apan sa Facebook account ni Casimero, iyang gipabuhagay ang tumang kahisagmuyo tungod kay bisan pa sa niining dako niyang kadaugan, aduna gihapoy boxing fans, ang mibatikos kaniya.
Usab, naglagot siya sa usa ka mainstream media, diin imbes mo-congratulate, mas giuna pa ang pagbalita nga gisuspenso siyag usa ka tuig sa Japan Boxing Commission (JBC) ug dili na makapahigayog away didto.
Unsaon, sa adlaw nga siya ug si Saul magkombati na alang sa usa ka non-title bout, super bantam weight, 122 lbs-category, milapas si Casimero og 1.23 lbs. Nga maoy gihimong rason sa JBC.
Ug ang makapakunot sa agtang, kay gitangtang na iyang ngalan sa listahan sa Inoue Naoya team sa ilang mga giplanohang boksidor nga ikasangka sa inampingan nilang Monster sa Japan. Busa, imposibleng may Casimero-Naoya fight pang mahitabo!
Si Masayuki Ito, promoter ni Casimero mipadayag sa iyang kabalisa sa gihimo ni Casimero. Matud pa sa usa ka FB post, duroha ka semana sa wala pa ang Sanchez-Casimero fight, gihatagan na niya kinig driver, balay ug maanindot lugar para ensayohan. Ug nganong wala gihapon makatuman sa hustong timbang?
Maayo gani, kay non-title ang maong away ug miuyon ra ang masig ka habig nga idayon kini.
Mao kini ang naka-pero-naka-apan ni Casimero – ang kakulang og disiplina, kooperasiyon ug ang paghunahuna unsa ka dakong alkanse ang mawala sa mga manedyer ug promoters ingkaso’g dili madayon ang bakbakan tungod lang sa overweight issue.
Kay kana lang pagpagamag tarpaulins, advertisement materials in any form, galastohan panahon sa training ug uban pa, nagkinahanglan na kinig dakong puhunang ibubo.
Unta, matangtang na kining maong pero nga anaa ni Casimero. Kay niini lang paagiha nga sama ni Eight-World Boxing Division champ Manny Pacquiao maka-magnet siyag bigtime boxing promoters, kinsa makapabilyonariyo pod niya samtang ania pa sa pinaka-prime moments sa iyang pagkaboksidor.
Unta, dili kini usikan!