Dear Atty. Divina,
Maayong adlaw kanimo, Atty. Ako diay si Ricky, 62 yrs old ug nag trabaho ko sa usa ka hardware diri sa Lilo-an. Ang akong pangutana attorney kun naa ba koy makuha o makabayad ba ang akong amo og mo resign nako sa akong trabaho? Nagtrabaho ko sa hardware since 1999 hangtud karon 2024.
Pila kaha ang akong madawat sa 25 ka tuig nakong pag serbisyo? Daghang Salamat and God bless.
* * *
Dear Ricky,
Ang usa ka empliyado kun mo-resign, dili obligado ang kompaniya nga mobayad kaniya kay voluntary man ang pag resign. Ang maayo nimong buhaton mao ang pag retire. Klaruha gyud ang term nga imong gamiton ha, kay kun mo resign ka, wa kay madawat nga bayad, apan kun mo-retire ka, kay lapas na man ka sa 60 anyos, aduna kay madawat nga retirement pay. Ang retirement pay nga imong madawat magdepende sa retirement plan sa company o sa Collective Bargaining Agreement kon CBA. Apan kun way CBA ug wa say retirement plan ang company, ang Republic Act No. 7641 nagkanayon nga ang retirement pay nga madawat sa empleyado equivalent to at least ½ month salary for every year of service or katunga sa imong matag buwan nga sweldo sa matag tuig nimong serbisyo. Mas maayo nga imong sultian ang imong gitrabahoan nga hardware nga gusto ka nang mo retire. Gawas sa imong retirement pay gikan sa imong employer, imo sab nga ma-process ang imong pension sa SSS ug imo sab unya nga makuha ang imong contribution sa Pagibig, apan kinahanglan kini nimong i-process . Thank you and God bless!
Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.