Oktubre 13, 2024: Ikakawhaag-walo nga Domingo sulod sa tuig
Mga Pagbasa: Kin. 7;7-11/Sal. 90/ Heb. 4;12-13/Mk. 10;17-30
Maayong Balita
Paigo ra ba ang pagsunod sa gilatid sa balaod o may angayan pa ba kitang himoon. Duna unta toy tawo nga madasigong nipresentar sa iyang kaugalingon apan human madungog ang hagit nga ibaligya ang tanang katigayonan ug ang halin ihatag ngadto sa mga kabos. Nagminghoy siya tungod kay dato man siya kaayo.
Mao nga nakaingon ang Ginoo nga malisud alang sa usa ka dato ang pagsulod sa Gingharian sa langit kaysa kamelyo nga mosulod sa lugag dagom.
Kasinatian
Dili ikalimod nga kita nagapos sa mga bahandi ingon man mga kabalaka sa atong seguridad mao nga malisud alang kanato ang paghatag dayon sa atong hinanaling pagsanong. Ang atong kadasig mahulipan dayon og kaluya.
Motalaw dayon kita sanglit malisud alang kanato ang pagbiya sa atong naandan ug dili kita buot nga makalingkawas sa atong tagsa tagsa ka mga comfort zones.
Kun mao man kini ang atong naandan pangutan-on nato ang atong kaugalingon: “Andam ug takus ba ako nga mosunod sa Ginoo?”
Lihok
Karong semanaha anaron nato ang atong kaugalingon sa pagbuhi sa bisan unsa ug ni bisan kinsa nga mamahimong babag sa pagsunod kang Kristo atong magtutudlo.
Pangamuyo
Tanan: Ginoo, dili man tuod ako takus nga mosunod kanimo gumikan sa akong kahuyangan apan hatagi intawon ako sa grasya nga mas pilion ko ikaw kaysa mga butang o tawo nga lumalabay lamang.
Ikaw nga buhi ug hari hangtud sa kahangturan. Amen