EDITORYAL — POGO sa Cebu City?

Daghang nagpaabot sa pagtungha ni kanhi Cebu City mayor Tomas Osmeña isip resource person sa quad-committee hearing sa Ubos Balay Balauranan mahitungod sa Philippine Offshore Gaming Operation ug extra-judicial killings.

Ang pokus sa maong hearing klaro nga nagtumbok sa mga panghitabo sa panahon sa nakalabay nga administrasyon, panahon nga miturok nga murag mga uhong kining mga POGO ug ang kontrobersyal nga war on drugs tungod sa mga extra-judicial killings.

Wala maglangay ang kanhi mayor sa pagbutyag sa iyang mga “nahibaw-an” ug unang gihisgutan ang kanhi CIDG-7 chief ug nahimong CCPO director nga si kanhi police colonel Royima Garma nga gihulagway niyang nakahimo og daghang mga kalapasan gamit ang iyang posisyon ug naalaot ang daghang mga Sugbuanon.

Apan murag didto ra kutob, walay bug-at nga impormasyon siyang nahatag nga nagkonektar kang Garma sa POGO gawas lang sa paghisgot niya sa buhatan sa  PCSO.

Kung balikon og paminaw ang iyang gipamahayag didto wala gyud siyay impormasyon nga duna gyuy POGO sa Cebu City. 

Apan si acting Cebu City Mayor Raymund Alvin Garcia pagkakaron mimando sa pagpapangita ug pagmonitor ani ug kanang POGO-like businesses.

Lahi sa Lapu-Lapu City nga aduna gyuy POGO nga gi-raid ug 169 ka mga langyaw ang nangadakpan.

Apan sa Cebu City, suspetsa ra ang gibutyag ni Osmeña apan makaduda nga iyang gilakbit paghisgot ang pangalan sa dugay na kaayo niyang kritiko nga si kanhi Office of the President Assistant for the Visayas (OPAV) Michael Dino nga gituohang dako og papel nganong naparot kini sa 2019 elections.

Si Osmeña mipadayag nga nabalaka siyang ang mga tawong nalambigit aning POGO konektado sab kang Dino kinsa iyaha sab gituohang maoy tagiya aning daghang mga gipangtukod nga mga high-rise buildings nga wala sab niya ibutyag kun asa.

Mura og gibitin ra ni Osmeña ang quad-committee nga gustong makahipos og mga impormasyon bahin sa POGO ug EJK.

Mas maayo tingali nga mopresentar ang kanhi mayor og mga ebidensiya bahin niini kay ngil-ad paminawon kun mohingalan lang og tawo nga walay pruweba.

Kay kun walay bug-at nga ebidensiya ug undanon nga impormasyon para makatabang sa pagpanday og mga balaod, nag-usik lang sila og panahon kaniya.