Lupigan ang mga teleseries karon sa mga telebisyon sa kasikas karon sa Ubos Balay Balauranan ug Senado tungod sa mga kulbahinam nga drama nga ilang gibabos banosan sa pagkuninit niining panahona.
Buhong kaayo ang mga senador ug kongresista sa ka abunda sa materyales nga ilang magamit sa pagpahumot sa ilang imahen, buffet ang dalit kanila sa mga first class nga palabas nga daw sila karon ang bida ilabi na sa mga gustong magpapili sa politika, perfect kaayo kay hapit naman ang eleksiyon.
Ang mga menu nga anaa sa ilang lamisa ang isyu sa budget hearing sa Office of the Vice President diin gigaling nila og pangutana si VP Sara. Apan wala silay napuga sanglit gikaon man silang buhi sa bise presidente nga wala gyud magpapilde, igo nalang sila sa kalagot. Sinugdanan pa lang kadto kay duna pay mosunod nga mas dako diin gidahum na daan ni Sara nga ang katuyoan gyud mao ang impeachment batok kaniya.
Mas lamian ug dako nga putahe ang POGO nga gilambigit kang Alice Guo kinsa nakaekyas pagawas sa nasud apan nadakpan ra usab didto sa Indonesia. Karon left and right ang hearing sa mga kaso, gawas sa korte duna usay mga imbistigasyon sa Senado ug Ubos Balay Balauranan nga wala gihapon silay napuga sanglit wais man kaayo si Gou nga gipatuyok lang sila sa iyang palad hinungdan nga gi-cite for contemp siya ug ingon usab niini ang nahitabo sa kongreso.
Sa Senado ang nakita nako nga dunay sense ang tumong ug tuyo ug ang mga pangutana sila ra man segurong Senador Riza Hontiveros ug Win Gatchalian nga maoy nagpabuto sa isyu sa pagkatawo ni Alice Gou, samtang ang ubang senador ambot lang gusto lang magpasikat.
Ang isyu ng dako usab kang KOJC Pastor Apolo Quiboloy nga seguradong gihuwat ang pagtunga niini sa duha ka balay balaoranan nga mao usay kuninitan sa mga walay kabusganan nga magbabalaod.
Pipila pa lang kini sa mga nag unang putahe nga ilang gipistahan in aid of legislation kuno. Maayo unta kon tinuod apan sa mga nahaunang imbistigasyon nila duna bay napa day sila nga mga balaod gikan sa mga isyu nga ilang giimbistigahan?
Ang pag-umol og balaod ang ilang tahas nga nalimtan na nila karon kay daw nagtuo na sila nga sila na karon ang mga prosecutor ug mga huwes sa mga tawo nga ilang resource person kay kong dili nila makuha ang gustong tubag ila man dayon nga i-contempt. Mora’g gikuha na nila ang trabaho sa DOJ ug sa judiciary.
Maayo man ang ilang tinguha apan mipatigbabaw na ang ilang personal nga interest iyahay na og pasikatay kon kinsa ang gamhanan. Imbis in aid of legislation, in aid of grandstanding naman hinuon ang nahitabo katon sa duha ka balay balaoranan.