Politika ug Quiboloy

Nag-una sa gipahigayon nga survey sa RP-Mission Foundation Incorporated niadtong Hulyo 1-10 sa pagka mayor si Cebu City acting Mayor Raymund Alvin Garcia nga adunay 39 porsiyento. Gisundan siya ni suspended Mayor Mike Rama nga nakakuha og 17 porsiyento, ABC President Franklin Ong nga may 13 porsiyento, Cebu City North District Councilor Nestor Archival nga adunay 10 porsiyento ug si kanhi Custom Commissioner Yogi Ruiz nga nakakuha og 6 porsiyento. Wala malakip sa survey ang pangalan ni MCWD Chairman Atty. Joey DaLuz.

Sa interview ni Atty. Joey Daluz sa akong programa sa Xfm 88.3 Cebu sa tulomanong Sentro, gi-kwestiyon sa abogado ang kridibilidad sa survey agency.

Sa gipagawas nga resulta sa survey agency wala gisulti niini kun pila ka mga tawo ang ilang gipangutana ug ang paagi sa pagsurvey.

Adunay bintaha ug disbintaha ang resulta sa mga politikanhong survey. Una, makagiya kini sa kandidato sa paghukom sa pagpadayon o dili ba sa pagpapili. Ikaduha makakondisyon kini sa huna-huna sa mga tawo ug makamugna og bandwagon nga epekto.

Hinuon ang pinakaklaro nga survey sa politika nga mao na gayod ang makaila kun si kinsa ang pillion sa mga tawo sa bugnong lugaynon mao ang adlaw sa eleksiyon.

* * *

Gipahunong sa Regional Trial Court Branch 15 sa Davao City ang tulo ka adlaw na nga operasyon sa kapolisan nga nagpatuman sa mandato de aresto batok sa pangulo sa Kingdom of Jesus Christ (KOJC) nga si Pastor Apolo Quiboloy.

Ang rason sa huwes sa pagpahunong sa operasyon sa kapolisan mao nga nakalapas kinI sa Freedom of Religion ug academic rights sa  KOJC.

Karon pa ko nga ang pagpangita diay sa pinangita sa balaud makonsiderar nga kalapasan sa kagawasan sa relihiyon ug academic rights.

Sa laing bahin, dili ba makonsiderar nga obstruction of justice ang gihimo sa huwes?