Leksiyon sa tanan

Ang nahitabo ni Mandaue City Mayor Jonas Cortes nga gisuspenso sa Office of the Ombudsman bisan og kaalyado pa siya ni Presidente Bongbong Marcos, maayong panaminan sa ubang mga politiko ug opisyal sa kagamhanan.

Gipakita sa administrasyon ni Presidente Marcos nga ang iyang administrasyon dili kay mopahamtang ra og silot niadtong mga kaatbang niya sa politika, kondili, bisan kinsa nga mamatud-ang nakahimo og kasaypanan.

Si Cebu City Mayor Michael Rama gani nga wa gyud giapil pagpasaka og kaso sa upat ka kawani sa City Hall, gi-preventive suspension pa man og unom ka buwan. Mao na nga kamong naghimo karon og abuso, hunong na sa pagpangabuso.

Kon maghisgot kita og politika, makita man sab gud nimo nga si Mayor Rama miapil-apil man sa kalihokan ni kanhi Presidente Duterte nga nagsige na og panaway sa administrasyon ni Presidente Marcos.

Mitambong siya sa dakong kalihokan ni Duterte nga gipahigayon sa South Road Properties (SRP) nga nagsaway sa giingong plano sa kagamhanan nga usbon ang atong Konstitusyon.

Gisupak nilang Duterte ang maong tinguha nga Charter Change kay nagtoo sila nga dunay nagpahipi nga tumong niini nga mao ang paghimo’g kausaban aron malugwayan ang termino sa presidente.

Ang atong Konstitusyon nga nahimo niadtong 1987, nagtugot lang og usa ka termino sa Presidente ug Bise Presidente bali’g unom ka tuig, lahi sa Estados Unidos nga gitugotan ang presidente nila nga makapapili pag-usab, apan tag-upat ra sab ka tuig ang ilang termino.

* * *

Buyno, hisgotan nato si Mayor Rama. Daghan ang nahibu’ng nganong nakigsuod man siya kang Duterte nga mao man kini kaniadto ang miguba sa iyang kadungganan kay gibutyag nga siya drug protector.

Karon, mikuyog na si Mayor Rama sa mga kalihokan ni Duterte, ug tan-aw nako dili imposible nga mao kini ang usa sa mga rason nga gigukod gyud siya sa kadagkoan sa kagamhanan.

Ikaduha, dunay mga tawo ni Mayor Rama nga giingong maoy nakahimo niya og demalas, apan pabilin niya kini nga giduphan ug gilabanan.

Mora’g gituman gyud ni Mayor Rama ang iyang baruganan nga “politics will just pass by, while friendship will last.” Nindot man, pero kon dunay mga sakop nga makahimo og dili maayo, sayop na sab kon duphan lang gihapon.

Ingon usab niini ang tambag nako sa ubang mga opisyal sa kagamhanan, ug bisan na sa ubang mga tawo, nga kon dunay higala ninyo nga maghimo og dili maayo nga makapadaot kaninyo, putla na ang inyong kontak.

Para nako, sayop nga lakang ang pagpanalipod gihapon sa mga tawo nga nakahimo og sayop nga maoy nakamudmod nimo sa kadaotan.